Бу тугуй? Ким билэр?

Өлүөхүмэ улууһугар командировкаҕа бара сылдьан биир сэлиэнньэ кулуубун дьоҕус долбууругар эспэнээттэр быыстарыгар турар мас иһити бэлиэтии көрбүтүм. Бу тугуй? Ким билэр?

Дьиибэҕэ, дьонтон ыйыталаһан көрдүм да, үгүстэр билбэттэр эбит. Онон кыратык сырдатан ааһар ирдэнэр эбит диэн түмүккэ кэллим.  Бу синньигэс, уһун буочука курдук цилиндирдии быһыылаах төгүрүк иһиккэ сүөгэй кутан баран хатыыллар уонна иһигэр олоро сылдьар ытыгынан булкуйаллар. Ытык булкуйар кэмҥэ иһиттэн тахсан хаалбатын диэн дьоҕус күрүчүөктээх.

Куйаар ситимигэр: “Арыыны оҥоруу технологията былыргы кэмтэн биллэр. Ити туһунан аан бастакытын Библияҕа ахтыллыбыта. Арыы оҥорор мас иһиттэр биһиги эрабыт VI үйэтигэр үөдүйбүттэр.

Сүөгэйи ытыйар кэмҥэ, сыата-арыыта арахсар, бытархай арыыларга кубулуйар.  Арыыны төһөнөн уһуннук булкуйуллар да, соччонон хойуу буолар”, – диэн суруллар.

“Эспэнээттэри уонча сылтан бэттэх мунньан эрэбит. Сүрүннээн нэһилиэк саастаах дьоно аҕалар, барытын чөкөтөн иһэбит. Бастакынан өтүүгү, тууйаһы, лаампаны аҕалбыттара. Бу арыы оҥорор иһит, иһигэр ытыктаах”, – диэн кулууп уус-уран салайааччыта Наталья Кондратьева кэпсиир.

Бу курдук арыылыыр иһит Саха сиригэр 1950-с сылларга диэри туһаныллыбыта диэн устуоруктар бэлиэтииллэр. Оччолорго кыахтаах, сүөһүүлээх-астаах ыалга эрэ баар тэрил, олох уларыйан, билигин эспэнээт буолан турар. Урукку дьон хайдах курдук мындырын көрүҥ!