Арассыыйа анал байыаннай эпэрээссийэтин тыҥааһыннаах кэмнэригэр нэһилиэнньэ аҕа көлүөнэ дьоно туора турбаттар. Туох кыалларынан өй-санаа, сүбэ-соргу туталлар, хомуурга барар дьоммут кыайыы көтөллөөх эргиллэн кэлэллэригэр алгыстарын аныыллар.
Будимир Слепцов, Өрөспүүбүлүкэ бэтэрээннэрин сэбиэтин президиумун чилиэнэ, Бочуоттаах бэрэссэдээтэлэ:
— Бииргэ төрөөбүттэрим оҕолоруттан икки кыыс, биирэ Украинаҕа Сумы куоракка, биирэ Украина кыраныыссатыгар Белгород таһыгар Никольскай бөһүөлэгэр олороллор. Антах сэрии, бэттэх сэрии буолан, улаханнык долгуйаллар. Күн ахсын кэпсэтэ, билсэ турабыт. Никольскайга баар кыыс Москваҕа эбэтэр Дьокуускайга барарбыт дуу диир. Оттон Украинаҕа баар кыыспыт эдьиийигэр кэлээри гынарын букатын таһаарбаттар. Ол курдук сүрдээх кутталга олороллор.
Биир чугас аймах быраатым балаҕан ыйын 21 күнүгэр хомуурга ыҥырыллан барбыта. 48 саастаах. Биир ый ханна баара биллибэтэҕэ, киирсиигэ сырыттаҕа. Билигин бааһыран, Ейскэйгэ госпитальга сытар, кэргэнэ уонна балта кинини көрсөөрү көппүттэрэ.
Мин, 88 сааспар сылдьар тыыл бэтэрээнэ, сэрии диэн тугун билбит көлүөнэ киһитэ буоллаҕым дии. Биэнсийэҕэ тахсан баран, 11 сыл Өрөспүүбүлүкэ бэтэрээннэрин сэбиэтин салайбытым. Онон бэтэрээннэр ити кэм устатыгар эдэр ыччакка, нэһилиэнньэҕэ патриотическай иитиигэ балачча үлэни ыытан кэлбиппит. Быстах хомуур биллэриллибитигэр Президиуммут быһаарыытынан бары бэтэрээннэргэ, аҕаларга, ийэлэргэ хомуурга барар оҕолорбутун өйүөххэ, кинилэр чэгиэн-чэбдик туруктаах, этэҥҥэ кыайыылаах эргиллэн кэлэллэригэр алгыспытын тиэрдиэҕиҥ, бу балаһыанньаҕа дойдубут салалтатын, сэбилэниилээх күүстэрин өйүөҕүҥ, өрөспүүбүлүкэбит Ил Дарханын, салалтатын тула сомоҕолоһуоҕуҥ, кинилэргэ кынат буолан, күүс-көмө буолуоҕуҥ диэн диэн ыҥырыы таһаарбыппыт. Бэтэрээннэр улуустардааҕы, нэһилиэктэрдээҕи салаалара бары маны өйөөтүлэр, онон ыҥырыыбыт үлэлии сылдьар. Өрөспүүбүлүкэ бэтэрээннэрин сэбиэтин президиумун чилиэнин, Бочуоттаах бэрэссэдээтэлин быһыытынан бу курдук үлэлэһэ олоробун.
Биһиги дойдубут ити биир бандеровскай, неофашистскай Украинаны кытта эрэ сэриилэспэт, бүтүн НАТО састаабыгар баар 50 судаарыстыба Украинаны үбүнэн, сэрии сэбиргэлинэн, наемниктарынан хааччыйан, Арассыыйаны өрүттүбэт гына дьаһайар сыалланан биһигини утары сэриилии олороллор. Дойдубут баар буолара, суох буолара ыйааһын бэскитигэр турда. Онон Украина кыайтардаҕына, НАТО кыайтарар. Сүрдээх ыарахан балаһыанньаҕа олоробут. Маннык быһыыга-майгыга түмсүүлээх буоламмыт, биһиги хайаан да кыайыах тустаахпыт.
Былыр былыргыттан Арассыыйаны ким да кыайбатаҕа. Оччолорго даҕаны нуучча норуотун кытта манна олохтоох бары норуоттар, ол иһигэр сахалар, барытыгар кыттаннар, кыайыыны ситиһэргэ бэйэлэрин кылааттарын киллэрбиттэрэ.
Аҕа дойду Улуу сэриитин содулун, ыараханын билбит, норуот хаһаайыстыбатын чөлүгэр түһэриигэ төһө кыалларынан кыттыбыт, дууһалыын, санаалыын сэбиэскэй иитиилээх киһи буолан этэбин – норуот биир ньыгыл буола сомоҕолостоҕуна, кыайыахпыт диэн күүстээх санаанан салайтардаҕына, нэһилиэнньэни, уопсастыбаны түмтэхпитинэ, хайаан да кыайабыт.
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…