Булгунньахтаахха туристическай кластер тэриллиэҕэ

Булгунньахтаах сэлиэнньэтигэр  туристическай кластеры тэрийии туһунан Хаҥалас улууһун 1-кы Малдьаҕар нэһилиэгэр буолбут бырабыыталыстыба отчуотугар кэпсэттилэр.

Причалы уонна туһааннаах  инфраструктураны туристарга анаан тутууга өрөспүүбүлүкэ 10 мөл. солк. көрбүт.

«Суол-иис хаачыстыбалаах буолан, туристар кэлиилэрэ элбии турар. «Умнас» өрөспүүбүлүкэтээҕи суол тутуллуоҕуттан Хаҥалас улууһугар туризм сайдыыта үтүө өрүттэрдээҕин көрөбүт.  Булгунньахтаахха ис суоллары өрөмүөннээһин былааннаммыта», — диэн бырабыыталыстыба бэрэссэдээтэлин солбуйааччы   Анатолий Семенов эттэ.

Булгунньахтаахха чугастааҕы кэмҥэ 70 сыллардааҕы тутууттан оҕо уһуйаана 100 миэстэлээх икки этээстээх дьиэҕэ көһүөҕэ. Маны таһынан оҕо ускуустубатын уонна оҕо спортивнай оскуолатын тутуу боппуруостара дьүүллэһиллэр.

Орто оскуола Агрокластер бырайыагын көрдөрдө. Бу бырайыак үөрэх, экология, урбаан эйгэлэрин түмүөхтээх. Оҕо сайыҥҥы лааҕырын тэрийии былааннанар.

Тойон-Арыы сэлиэнньэтигэр 100-кэ киһи олорор. Билигин олохтоохтор нэһилиэк устуоруйатын, үгэстэрин харыстааһыҥҥа, култуурунай нэһилиэстибэлэрин  үөрэтиигэ, үрдэтиигэ үлэлииллэрин туһунан отчуот кэмигэр  кэпсээтилэр. Тимири уһанар урукку сири чөлүгэр түһэрбиттэр итиэннэ  сыллата «День наследия» диэни ыытар буолбуттар.

Тойон-Арыыга биэс сыллааҕыта саҥа хочуолунай үлэҕэ киллэриллэн, олорор дьиэлэр бары ититиигэ холбоммуттара.   Култуура дьиэтин өрөмүөнүн былаанныыллар.

Бу күннэргэ Хаҥалас улууһугар бырабыыталыстыба ааспыт сыллааҕы үлэтин отчуота ыытылынна.