Хаартыска: pxhere.com
РФ Айылҕа ресурсаларыгар уонна экологияҕа министиэристибэтин былырыын балаҕан ыйын 23 күнүнээҕи 631 №-дээх бирикээһинэн Булт быраабылатыгар уларытыылар киллэриллибиттэрэ. 2022 с. сэтинньи 30 күнүнээҕи бирикээс Юстиция министиэристибэтигэр регистрацияламмыта уонна күүһүгэр 2023 сыл кулун тутар 1 күнүттэн киирдэ. Маныаха Саха Өрөспүүбүлүкэтигэр тыыннаах куһу мончуук гынан атыыр куска бултааһыҥҥа чопчулааһыннар киллэриллибиттэрэ.
Атыыр куһу биир тыыннаах кус мончуугунан (подсадной) бултуурга икки булчуттан ордуо суохтаах диэн чопчуланна (бу иннинэ “Бултааһыны хааччахтааһын туһунан” СӨ Ил Дарханын Ыйааҕынан 3 булчуттан элбэҕэ суох диэн этэ).
Маны сэргэ Булт быраабылатыгар сааскы кэмҥэ уу көтөрдөрүн бултааһыҥҥа абзаһы эптилэр. Ол курдук, сааскы бултааһыҥҥа атыыр куһу бааһырдан баран дурдаттан 300 миэтэрэҕэ диэри уонна хааһы уонна хардырҕас хааһы дурдаттан 500 миэтэрэҕэ диэри сойуолаһар көҥүллэнэр.
Сааскы кэмҥэ уу көтөрүн дурдаҕа сытан эрэ бултааһын көҥүллэнэрин умнумаҥ.
Булт быраабылатын 46 пуунугар атыыр куһу бултааһыҥҥа быыстала суох 10 халандаарынай күн устата бултуур болдьох олохтонно. Өрөспүүбүлүкэ Арктикаҕа сытар уонна хотугу оройуоннарыгар хаастар уонна кустар кэлиилэригэр сөп түбэһиннэрэн болдьоҕу арааран олохтоммута.
Арассыыйа Айылҕа харыстабылын министиэристибэтин эрэгийиэннэр ылыммыт нормативнай-быраап аакталарын кэтээн көрүүлэринэн, “Саха Өрөспүүбүлүкэтин бултуур сирдэригэр көҥүллэнэр булт көрүҥнэрин уонна бултуур кэм болдьохторун быһаарар туһунан” СӨ Ил Дарханын Ыйааҕар араастаһыы (разногласие) баара этилиннэ.
Булт быраабылатын 50 пуунугар сөп түбэһиннэрэн, “Андыга (горбоносай уонна көннөрү) сааскы бултааһын Саха Өрөспүүбүлүкэтин сиригэр-уотугар чопчу ыам ыйын 29 күнүттэн бэс ыйын 4 күнүгэр диэри ыытыллар. Уонна эрэгийиэни түөлбэнэн араарбатылар.
Онон сибээстээн Булт муниципальнай сэбиэттэригэр андыны бултааһын болдьоҕор ыйытык ыытыллыбыта. Андыны бултааһын болдьоҕо төһө элбэх куолас ылыллыбытынан быһыллыаҕа.
Бу уларыйыылар эһиилги кэлэр дьыл булт кэмигэр киирэллэр. Билигин Ил Дархан ыйааҕын бырайыага оҥоһулла, сөпсөһүүтүн бара турар.
Анатолий ПОПОВ,
СӨ Экологияҕа, айылҕаны туһаныыга уонна
ойуур хаһаайыстыбатыгар министиэристибэтин
департаменын салайааччытын солбуйааччы.
Сэтинньи саҕаланна да, Өктөөп идеяларын өрө тутан кэлбит оҕо, эдэр сааспыт күргүөмнээх күннэрэ хайдах да…
Үөрэх этэринэн, киһи орто сааһа 120 сыл диэн да, дьиҥэ, олохпут итинтэн быдан ырааҕынан кылгас. Быраастар,…
Сыл ахсын сэтинньи саҥатыгар Арассыыйа бары эрэгийиэннэригэр "Ускуустуба түүнэ" диэн аахсыйа ыытыллар. Тэрээһин Норуоттар сомоҕолоһууларын…
Мүөттээх бальзам 500 г. грецкэй эриэхэни, 300 г. мүөтү, 100 г. алоэ сүмэһинин, 4 лимону…
Сарсын, сэтинньи 4 күнүгэр, Дьокуускайга трофейнай байыаннай тиэхиньикэ быыстапката арыллыаҕа. Бу күн биир сүрүн тэрээһининэн…
Владивостокка буолбут Уһук Илиҥҥи хуор олимпиадатыгар "Кыра оҕолор хуордара" номинацияҕа кыттан, "Туймаада эрэлэ" дипломунан уонна үрүҥ…