Булуҥ улууһугар сүппүт эр киһини көрдүүллэр

Саха сиринээҕи Быыһыыр сулууспа дьуһуурунайыгар киирбит иһитиннэриинэн, атырдьах ыйын 13 күнүгэр Булуҥ улууһун Түмэти бөһүөлэгин аттыгар Өлөөн өрүскэ эр киһи утуйа сытар оҥочото булуллубут.

Кэлин бу киһи кэпсээбитинэн,  кини доҕорун кытта оҥочонон Таймылыыр сэлиэнньэтиттэн айаннаабыт. Айан кэмигэр доҕоттор арыгы испиттэр, кэлин утуйан туран баран эр киһи оҥочоҕо доҕорун булбатах. Сүппүт эр киһи туһунан иһитиннэрии киирбитин кэннэ, 4 водолаз уонна көрдүүр бөлөх начаалынньыга салайааччылаах быһылаан тахсыбыт сиригэр тиийбиттэр. Гидролокатор көмөтүнэн ааспыт күннэргэ Өлөөн өрүс 10 тахса тыһ. миэтэрэ уһуннаах сири чинчийбиттэр. Көтөр аалынан уонна мотуордаах оҥочонон көрдүүр үлэлэр ыытылыннылар. Билиҥҥитэ сүппүт эр киһи булулла илик.