Булуҥ улууһугар сүппүт дьону көрдүүллэр

Ахсынньы 12 күнүгэр СӨ Быыһыыр сулууспатыгар Булуҥ улууһугар дьон сүппүтүн туһунан иһитиннэрии киирбит.

Ахсынньы 9 күнүгэр Тиксии бөһүөлэгиттэн Найбаҕа УАЗ массыына айаннаабыт. Ол гынан баран массыыналаах дьон тиийиэхтээх сирдэригэр тиийбэтэхтэр.  Массыынаҕа үс эр киһи баар эбит. Күн бүгүнүгэр диэри бу дьон ханна бааллара биллибэт, көстө иликтэр.

СӨ Быыһыыр сулууспатын сайаапкатынан сүппүт дьону көрдөөһүҥҥэ  ахсынньы 13 күнүгэр «Полярные авиалинии» АХ  Ми-8 бөртөлүөтэ көппүт.

Ол курдук Тиксиинэн, муора кытылынан,  Хопто, Хара Уулах үрэхтэринэн,  Найбанан көрдөөбүттэр да булбатахтар.

СӨ Быыһыыр сулууспатын салайааччыта Иннокентий Андросов иһитиннэрбитинэн, ахсынньы 14 күнүгэр күнүс Тиксииттэн Ми-8 бөртөлүөт көппүт, көрдөөһүн салҕанар.