Булуҥҥа дьокутаат балыгынан сокуоннайа суохтук эргинэн сууттанна

Булуҥ оройуонун дьокутаата уонна урбаанньыт сокуоннайа суохтук балыгынан эргиммиттэрэ биллибит. Урбаанньыт массыынатыттан 6,6 мөл.солк. тахса суумалаах маркировкаламматах тоҥ балыгы булбуттар. Табаары Тиксииттэн Дьокуускайга илдьэн испиттэр. 

2024 сыл тохсунньутугар-олунньутугар дьокутаат, балыгынан эргинэр тэрилтэ дириэктэрэ уонна урбаанньыт туут, муксуун уонна уомул балыктарынан сокуоннайа суохтук эргинэр схеманы тэрийбиттэр диэн УФСБ Саха сиринээҕи управлениета уонна Силиэстийэлиир кэмитиэт иһитиннэрэллэр.

6,6 мөл.солк. суумалаах балыгы тиэйэргэ рефрижератордаах «КамАЗ» массыынанан туһаммыттар. Докумуоннарга, бэтэринээр сибидиэтэлистибэтигэр сымыйа дааннайдары булбуттар.

Холуобунай дьыала тэриллэн, буруйдара билиниллибит. Суут иккиэннэригэр 200-түү тыһ.солк. төлүүргэ ыстараабы  анаабыт. Итиэннэ балыгы тиэйэн испит 6 мөл.солк. тахса сыаналаах массыынаны судаарыстыба дохуодугар ылбыттар.