Булуҥҥа үс киһилээх КАМАЗ сүттэ

Бүгүн, ахсынньы 22 күнүгэр, 13:45 чааска Булуҥ улууһун Бороҕон нэһилиэгин баһылыгын солбуйааччы Биир кэлим диспетчер-дьуһуурунай чааһыгар үс киһилээх КАМАЗ массыына ахсынньы 20 күнүгэр Тиксииттэн Нам сэлиэнньэтигэр диэри айаннаабытын уонна Найбаҕа тиийбэтэҕин иһитиннэрбит. 

Сибээстэрэ суох, спутниковай төлөпүөннэрэ суох.

Бүгүн Булуҥҥа бу тула кэпсэтэн баран, маннык диэн быһаарбыттар: суоппар Намҥа диэри Найбаҕа таарыйбакка айанныыр былааннаах эбит. Суотабай сибээс хабар сиригэр кэллэхтэринэ, биллиэх буолбуттар.

Билигин Намтан Найбаҕа диэри «Сахаэнерго» тиэхиньикэлэрэ айаннаан иһэллэр. Суоппардарга КАМАЗ дааннайдарын эппиттэр. Нам уонна Найба икки ардыгар массыына көстүбэтэҕинэ, Найба уонна Тиксии икки ардынан көрдүүр туһунан быһаарыныы ылыныллыахтаах. Билигин бу сиргэ күн-дьыл туруга уустук, буурҕалаах.