Буойун-бэйиэт Василий Рожин кинигэлэрин сүрэхтээтилэр

Байыаннай дьайыыга баҕа өттүнэн баран сырдык тыынын толук уурбут боотур, «Эр санаа» уордьан, «Хорсунун иһин» мэтээл кавалердара,  Н.Д. Неустроев аатынан эдэр суруйааччылар өрөспүүбүлүкэтээҕи бириэмийэлэрин лауреата,  Саха сирин Суруйааччыларын сойууһун иһинэн Эдэр литератордар сүбэлэрин чилиэнэ,  Дьааҥыттан төрүттээх талааннаах бэйиэт Василий Рожин  «Уот сүрэх» уонна  «Оставляя белый след» диэн хоһооннорун хомуурунньуктарын сүрэхтэниитэ тохсунньу 23 күнүгэр Н.Д. Неустроев аатынан Smart-бибилэтиэкэҕэ буолла.

Саха сирин суруйааччыларын сойууһа бэйиэт суох буолбутун да кэннэ, кинигэлэрин хомуйан, таҥан, бэчээттэтэн таһаарбыта. Василий сахалыы да, нууччалыы да хоһоон суруйар этэ, онон кинигэлэрэ икки тылынан тахсыбыттара кэрэхсэбиллээх, бэйэтин ааҕааччытыгар тиийиэхтээх. Эдэр бэйиэт олох, таптал, дьон сыһыанын туһунан бөлүһүөктүү уонна лирикэлии хоһоонноругар эр киһи хоодуот санаата уонна бэйиэт нарын айылгыта алтыһаллар.

Саалаҕа толору киһи кэлбитэ үөрдэр, ордук дьааҥылар тэринэн, оҥостон, анаан кэлбиттэр. Василий ийэтэ Людмила Васильевна Дьааҥыттан анаан кэлэн уонна бииргэ төрөөбүт  балта Евгения кинигэ сүрэхтэниитигэр кытыннылар, тыл эттилэр, махтаннылар.

Култуура, духуобунай сайдыы миниистирэ Афанасий Ноев, Ил Түмэн вице-спикерэ, байыаннай сулууспалаахтар, байыаннай дьайыы бэтэрээннэрин дьыалаларыгар, патриотическай иитии уонна уопсастыбаннай түмсүүлэр боппуруостарыгар бастайааннай кэмитиэт бэрэссэдээтэлэ Александр Подголов, норуодунай бэйиэт Наталья Харлампьева, норуодунай суруйааччы Николай Лугинов тыл эттилэр.

Саха тыйаатырын артыыстара бэйиэт хоһооннорун уус-ураннык аахпыттара долгутуулаах түгэн буолла. Ону тэҥэ, доҕордоругар — Василий Рожиҥҥа анаабыт хоһооннорун эдэр бэйиэттэр Николай Васильев-Харыйалаах Уола, Сардаана Корякина, Сюзанна Кондакова аахтылар.

“Уот сүрэх” кинигэ “Айар” кыһаҕа 1400 экземплярынан таҕыста. Хомуйан оҥорооччу —  Гаврил Андросов. Бэчээккэ бэлэмнээтилэр — Рустам Каженкин, Евгения Рожина. Аан тылы Наталья Харлампьева суруйда. Эрэдээктэр — Марина Степанова. Хоһооннор хомуурунньуктарыгар 73 хоһоон киирбит. Бу кинигэ Эдэр суруйааччылар өрөспүүбүлүкэтээҕи сүбэ-мунньахтарын мэктиэлээһинэн тахсыбыта.

 “Оставляя белый след”  кинигэ “Алта” кыһаҕа бэчээттэннэ. Ахсаана — 500 устуука. Хомуйан оҥорооччулар — Гаврил Андросов, Рустам Каженкин, Евгения Рожина. Аан тылы Николай Лугинов, Дьааҥы улууһун баһылыга  Владислав Иванов суруйдулар. Литературнай эрэдээктэр — Григорий Шувалов (Москва). Дьааҥы улууһун дьаһалтатын, Саха сирин Суруйааччыларын сойууһун, СӨ Духуобунас академиятын өйөбүллэринэн таҕыста.

Василий Рожин байыаннай дьайыыга баҕа өттүнэн барбыта. Бааһыран, төннөн кэлэн, эмтэммитэ эрээри, төттөрү барбыта. 2022 сыл сэтинньи 13 күнүгэр ДНӨ Нескучное сэлиэнньэтин аттыгар, 32 сааһыгар сырдык тыына быстыбыта. «Хорсунун иһин» мэтээлинэн, «Эр санаа» уордьанынан наҕараадаламмыта.

Бэйиэт өлбүтүн да кэннэ, кэннигэр хаалаллар уот сүрэҕин төлөнө, итии илбистээх тыллара, оҕолорун тэҥэ хоһооннор …