Буойун-бэйиэт Василий Рожиҥҥа анаммыт күрэстэр түмүктэннилэр

Быйыл ыам ыйын 26 күнүгэр бэйиэт, Саха сирин суруйааччыларын сойууһун Эдэр литератордарын сүбэтин чилиэнэ, Н.Д. Неустроев аатынан эдэр суруйааччылар бириэмийэлэрин лауреата, Анал байыаннай дьайыы кыттыылааҕа, «Эр санаа» уордьан уонна «Хорсунун иһин» мэтээлинэн наҕараадаламмыт Василий Рожин 35 сааһын туолуохтааҕа.

Кини сырдык тыына 2022 сыл сэтинньи 13 күнүгэр Донецкай норуодунай өрөспүүбүлүкэ Нескучное диэн дэриэбинэтин ылар иһин кыргыһыыга быстыбыта. Василий Рожин төһө да кылгас олоҕу олордор, кини айар үлэтэ дьоҥҥо-сэргэҕэ балай даҕаны билиннэ – хоһоонноро «Чолбон», «Полярная звезда» сурунаалларга, өрөспүүбүлүкэ хаһыаттарыгар бэчээттэммиттэрэ, 2023 сыллаахха «Уот сүрэх», «Ославляя белый след», «Лунный блик» кинигэлэрэ тахсыбыттара.
Буойун-бэйиэт төрөөбүт күнүгэр кини сырдык аатыгар Саха сирин суруйааччыларын сойууһун Эдэр литератордарын сүбэтэ биллэрбит күрэстэрэ түмүктэннилэр.

«Лунный блик и мой рассвет» диэн ааттаах Анал байыаннай дьайыы дьоруойдарыгар уонна буойун-бэйиэт Василий Рожиҥҥа анаммыт поэзия өрөспүүбүлүкэтээҕи күрэһин бэйиэттэр – Саха сирин суруйааччыларын сойууһун бэрэссэдээтэлэ Гаврил Андросов, бэрэссэдээтэли солбуйааччы Рустам Каженкин, Эдэр литератордар сүбэлэрин салайар Харыйалаах Уола дьүүллээтилэр.
«Лунный блик и мой рассвет» поэзия күрэһин түмүгэ:

18-35 саастаахтарга (8 үлэ):
1 м. Гаврил Адамов (Хаҥалас);
2 м. Дария Кардашевская-Отончоон (Үөһээ Бүлүү);
3 м. Айаал Оконешников-Аан Айаал (Чурапчы).

36 үөһэ саастаах сахалыы ааптардарга (55 үлэ):
1 м. Семен Капитонов (Амма);
2 м. Ульяна Рожина (Дьааҥы);
3 м. Дмитрий Протопопов-Ураты уран тыл (Дьокуускай).

36 үөһэ саастаах нууччалыы ааптардарга (17 үлэ):
1 м. Михаил Иванов (Дьокуускай);
2 м. Варвара Колесова (Аллайыаха);
3 м. Наталья Акимова (Амма).

«Я всегда приду обратно и вернусь к своим стихам» диэн ааттаах буойун-бэйиэт Василий Рожин хоһооннорун уус-уран ааҕыы өрөспүүбүлүкэтээҕи күрэһин П.А. Ойуунускай аатынан Саха академическай тыйаатырын литература чааһын сэбиэдиссэйэ, Арассыыйа суруйааччыларын сойууһун чилиэнэ Надежда Ильина, тыйаатыр артыыһа, Анал байыаннай дьайыы кыттыылааҕа Дмитрий Татаринов уонна Эдэр литератордар сүбэлэриттэн прозаик Сардаана Корякина дьүүллээтилэр.

«Я всегда приду обратно и вернусь к своим стихам» уус-ураннык ааҕыы күрэһин түмүгэ:
Оҕолорго (15 үлэ):
1 м. Лея Мыреева (Дьокуускай к. 17 №-дээх оскуолатын 3 «г» кылааһын үөрэнээччитэ);
2 м. «Русская классика» эбии дьарык иитиллээччилэрэ (Чурапчы улууһун С.Д. Флегонтов аатынан Хадаар оскуолатын 5 кылааһын үөрэнээччилэрэ, сал. С.А. Протопопова);
3 м. Аристарх Лукин (Чурапчы улууһун С.Д. Флегонтов аатынан Хадаар оскуолатын 9 кылааһын үөрэнээччитэ, сал. С.А. Протопопова).

Улахан дьоҥҥо (16 үлэ):
1 м. Матрена Слепцова (Дьааҥы);
2 м. Иван Кондаков-Тимирхан (Бүлүү);
3 м. Любовь Дьячковская (Чурапчы).

Хоһоон айыытын күрэһигэр бастаабыт Михаил Иванов Анал байыаннай дьайыы кыттыылааҕа эбит. Кини туһунан кэргэнэ Ангелина Белолюбская сэһэргээтэ:
– Миша билигин Хабаровскайга госпиталга эмтэнэ сытар. Барыта 30 эпэрээссийэни ааспыта, атаҕын ампутациялаабыттара. Анал байыаннай дьайыыга 2022 сыллаахха барбыта. Хоһооннорун бастаан миэхэ эрэ анаан суруйара, онтон инники кирбиигэ, госпиталга сытан сэрии хонуутугар сүтэрбит доҕотторун, таптал туһунан айар буолла. Кини ыраах сылдьар буолан биһиги хоһоонунан суруйсабыт, ону түмэн кинигэ оҥорбуппун бу күрэскэ ыыппытым. Мишаҕа эппэтэҕим, бүгүн хоһоонуҥ күрэскэ бастакы миэстэни ылла диэн биллэрбиппэр олус соһуйда уонна үөрдэ.
Күрэстэр кыайыылаахтара кыттааччылар төлөбүрдэриттэн киирбит уонна Василий Рожин дьиэ кэргэнэ, Эдэр литератордар сүбэлэрэ туруорбут харчынан бириистэринэн наҕараадаланнылар.

Лилия Иванова.