«Буойун» киин Саха сиринээҕи филиалын тэрийэргэ инструктордары бэлэмнээһин саҕаланна

«Буойун» ыччаты байыаннай-спортивнай бэлэмнээһиҥҥэ уонна патриотическай иитиигэ киинин Тюменнээҕи салаатын баазатыгар Саха сириттэн уонна атын даҕаны эрэгийиэннэртэн үс ыйга инструктордары бэлэмнээһин саҕаланна диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

Киин дойду 12 субъегар бэйэтин филиалларын номнуо аһан үлэлэтэр уонна өссө саҥа сирдэргэ тэрийэргэ былаанныыр. Онуоха тэрилтэ үөрэхтэрин бүтэрэн, саҥа эрэгийиэннэрдээҕи салааларга үлэлии барыахтаах 100 хандьыдааты бэлэмнээн эрэр. Үөрэх бырагыраамата саҕаланарыгар анаммыт үөрүүлээх тэрээһин Тюмень уобаластааҕы Дууматыгар буолла.

«Буойун» ыччаты байыаннай-спортивнай бэлэмнээһиҥҥэ уонна патриотическай иитиигэ киинэ дойду Бэрэсидьиэнэ Владимир Путин сорудаҕынан Арассыыйа көмүскээччилэрин уонна эдэр көлүөнэ патриоттарын иитэр аналлаах тэриллибитэ. Киин филиалларыгар уопуттаах инструктордар 14-35 саастаах ыччаты, үөрэнээччилэри уонна устудьуоннары хабан туран, аҕыс байыаннай хайысханан, ол иһигэр РФ национальнай куттал суох буолуутун төрүттэригэр, тактическай, инженернэй бэлэмнэниигэ, пилота суох көтөр аппараты көтүтүүгэ уонна тактическай мэдиссиинэҕэ үөрэтэллэр.

Инструктор буолуохтаах дьону РФ Бэрэсидьиэнин дьаһалтатын салайааччытын бастакы солбуйааччы Сергей Кириенко эҕэрдэлээтэ.

«Эһигини улахан туһалаах үлэ күүтэр. Ол түмүгэр, эһиги, Арассыыйаҕа тапталларын, тылларынан эрэ буолбакка, бастатан туран, дьыаланан бигэргэтэр, биһиги уопсастыбабыт үгэскэ олоҕурбут сыаннастарын харыстыыр дьиҥнээх патриоттары иитиигэ усулуобуйаны тэрийэргэ билиини-көрүүнү уонна сатабылы ылыаххыт диэн эрэнэбин. Инструктор – преподаватель эрэ буолбатах, кини бэйэтин холобурунан оҕолору бэйэ-бэйэҕэ көмлөһөргө, хамаанданан үлэлииргэ үөрэтэр, күүстээх өрүттэрин арыйар уонна бэйэтин бу олоххо булунар уһуйааччы, табаарыс буолуохтаах диэн бэлиэтээн этэбин», – диэтэ Сергей Кириенко.

«Буойун» киин эбии үөрэхтээһинин бырагыраамата ыччаттарга эрэ буолбакка, эрэгийиэннэр баһылыктарыгар, муниципалитеттар салайааччыларыгар, судаарыстыбаннай сулууспалаахтарга улахан биһирэбили ылар. Итини Киин каадырдары бэлэмнээһиҥҥэ саҥа бырагырааманы оҥорууга учуоттаата.

«Биһиги кэнэҕэски инструктордарбыт ааспыт сыллар уопуттарын учуоттаан ситэриллибит бырагырааманан үөрэниэхтэрэ. Кинилэр үс ый үөрэниэхтэрэ. Уһуйааччы быһыытынан, аан бастаан «Буойун» киин филиалларын салайааччылара үөрэтиэхтэрэ», – диэн «Буойун» киин бырабылыанньатын бэрэссэдээтэлэ, Госдума дьокутаата Виктор Водолацкий кэпсээтэ. – Киин инструктордара биэрэр уопуттара кинилэр профессиональнай дьоҕурдарын уонна бырайыагы бүтүннүүтүн сайыннарарга бигэ акылаатынан буолуоҕа».