“Буойун” киин “Знание. Премия” наҕараада номинациятынан бэлиэтэннэ

“Буойун” киин “Знание. Премия”  наҕараада “Үөрэхтээһин уонна настаабынньыктааһын эйгэтигэр үөрэххэ кылаатын иһин” номиациянан бэлиэтэннэ.

РФ бэрэсидьиэнэ Владимир Путин сорудаҕынан 2022 сыл ахсынньы 1 күнүгэр тэриллибит “Буойун” киин төрөөбүт дойдуларын таптыыр уонна сатаан көмүскүүр патриоттар саҥа көлүөнэлэрин иитиинэн  дьарыктанар.

Киин салаалара Арассыыйа 21 эрэгийиэнигэр, ол иһигэр Саха сиригэр, үлэлииллэр. “Буойун” үлэлиирин устатыгар настаабынньыктааһын киэҥ хабааннаах тиһигин тэрийдэ, ол көмөтүнэн Арассыыйаҕа үүнэр көлүөнэни патриоттуу тыыҥҥа иитиигэ  биир саамай көдьүүстээх платформанан буолла.

“Билии” уопсастыба иһитиннэрбитинэн, сэтинньи 25 күнүгэр “Арассыыйа” Национальнай кииҥҥэ Киин үлэтин  билиһиннэрии буолуоҕа, түмүктэр 2026 сыл олунньу 26 күнүгэр таһаарыллыахтара.

“Буойун” киин хамандыыра, Арассыыйа Дьоруойа уонна  бэрэсидьиэн “Дьоруойдар кэмнэрэ” бырагырааматын кыттыылааҕа Андраник Гаспарян Киин инструктордара үөрэтэр эрэ буолбатахтарын, бэйэлэрин холобурдарынан ыччаты көҕүлүүллэрин уонна төрөөбүт дойдуну таптааһын дойдуга истиҥ тапталтан саҕаланарын көрдөрөллөрүн бэлиэтээн эттэ. Билигин “Буойун” кииҥҥэ  ыччаты  үөрэх араас бырагырамаатыгар үөрэтэр настаабынньыгынан 400-чэ инструктор үлэлиир (байыаннай дьайыы 313 бэтэрээнэ уонна байыаннай дьайыы 187 кыттыылааҕа).

Үөрэх бырагыраамата тиһигин быспакка саҥардыллар. Ол курдук, РФ бырабыыталыстыбатын бэрэссэдээтэлин солбуйааччы – Уһук Илиҥҥи федеральнай уокурукка РФ бэрэсидьиэнин боломуочуйалаах бэрэстэбиитэлэ Юрий Трутнев көҕүлээһининэн уонна Арассыыйа Дьоруойа Ярослав Якубов салалтатынан, бойобуой снайпинг федерациятын кыттыытынан, 2025 сыллаахха “Буойун” кииҥҥэ ыччаты “снайпинг” хайысхатыгар үөрэтии саҕаламмыта.

“Буойун” киин исписэлиистэрэ “Быть, а не казаться!” настаабынньыктар куонкурустарыгар хайыы үйэ иккис сылын субуруччу кыттар. 2025 сыллаахха Арассыыйа 12 эрэгийиэниттэн 96 үлэһит  сайаапкалары сыаналыырга уонна эспэртиисэни ыытарга көмөлөстө. Киин биэс бэрэстэбиитэлэ  куонкурус финалиһынан буолла.

Киин ону сэргэ “Билии” Арассыыйа уопсастыбатын кытары үлэлэһэр, ыччаты патриоттуу тыыҥҥа иитиигэ тэрээһиннэри уонна лиэксийэлэри ыытар. Бу үлэҕэ Киин араас салаатыттан 45 кэриҥэ инструктор кыттар.

СӨ Ил Дарханын уонна бырабыыталыстыбатын пресс-сулууспата