«Буойун суола» — олоххо кыайыыга сирдииллэр

Саха сиригэр балаҕан ыйын 15–20 күннэригэр «Энэргиэтик» оҕо лааҕырын баазатыгар Бүтүн Арассыыйатааҕы байыаннай-тактическай «Путь воина» күрэхтэһии ыытылынна. Хабаровскай кыраайтан, Волгоградскай уонна Тюмень уобаластартан уонна Саха сириттэн, уопсайа 48 оҕо, бастакы сүүмэрдиир түһүмэҕи ааһаннар кытыннылар

Тэрийээччилэр ситиһиини баҕардылар

Күрэхтэһии сахалыы үгэһинэн сири-уоту аһатыынан, алгыһынан аһылынна. Тэрээһин «ВОИН» киин хамандыырын, Арассыыйа Дьоруойун Андраник Гаспарян уонна СӨ Ил Дарханын Айсен Николаев тыл этиилэринэн саҕаланна. РФ бырабыыталыстыбатын бэрэссэдээтэлин солбуйааччы Юрий Трутнев эҕэрдэтин тириэртилэр.

«Эһиги бары улахан тургутуулары ааспыт, хас да күрэхтэһиигэ кыайан, талыллан кэлбит кыттааччыларгыт. Аҕа дойду кэлэр көлүөнэ көмүскээччилэрин иитиигэ бу күрэхтэһии улахан суолталаах. Кыайыыга дьулууру, ситиһиини баҕарабыт», — диэн Андраник Гаспарян эттэ.

Айсен Николаев бу курдук суолталаах патриотическай бырайыагы ыытарга биһиги өрөспүүбүлүкэбит талыллыбытынан киэн туттарын биллэрдэ: «Дойдуга билигин уустук, байыаннай дьайыы балаһыанньата бүрүүкээн турар кэмэ. Биһиги биир дойдулаахтарбыт, дойдуларын көмүскүү сылдьаллар. Саха сирэ 12 Арассыыйа Дьоруойданна. Эһиги эмиэ инникитин дойдуну көмүскүүр дьон буолуоххут. Күрэхтэһии хайдах түмүктээх буоларыттан тутулуга суох, эһиги хас биирдиигит дьиҥнээх кыайыылаахтаргыт», — диэн Айсен Николаев эттэ.

Оттон «ВОИН» киин дириэктэрэ Дмитрий Шевченко дьиҥнээх көмүскээччи суолугар дьиссипилиинэ уонна хорсун быһыы суолтатын бэлиэтээтэ.

Дьоруойдары кытта көрсүһүү

Тэрээһин чэрчитинэн, курсаннар Арассыыйа Дьоруойдарын кытары көрүстүлэр. Арассыыйа Дьоруойдара Александр Колесов уонна Николай Соловьев бэйэлэрин уонна бойобуой сырыыларын, байыаннай дьайыы туһунан кэпсээтилэр. Көрсүһүүнү байыаннай дьайыы кыттыылааҕа, СӨ ыччатын миниистирэ Петр Шамаев иилээн-саҕалаан ыытта.

Арассыыйа Дьоруойа Александр Колесов байыаннай-патриотическай күрэхтэһиилэр кыттааччыларын кытта көрсүһүү истиҥник ааспытын бэлиэтээтэ. Кини маннык тэрээһиннэр эдэр дьон доҕордоһуу суолтатын уонна Ийэ дойду иннигэр эппиэтинэһи өйдүүллэригэр көмөлөһөрүн тоһоҕолоото.

«Боотур» бастакы түһүмэххэ кыайда!

Бастакы күн «Боотур» хамаанда күрэхтэһиигэ ситиһиилээхтик кытынна. Күрэхтэһии бастакы күнүгэр Саха сирин уонна Хабаровскай кыраай хамаандалара кытыннылар.

Саха сирин «Боотур» хамаандата үрдүк таһымнаах бэлэмнээхтэрин көрдөрөн, Хабаровскай кыраайтан сылдьар «Амур буойуннарын» кытта күөн көрсөн кыайыыны ситистэ. Бу дьиҥнээх сэриилэһиигэ майгынныыр оонньууга, күрэхтэһии бастакы күнүн түмүгүнэн, саха хамаандата утарылаһааччытын бүтүннүү кэриэтэ «охтордо», биир хамандыыр эрэ «тыыннаах» хаалла. Оттон «Боотурга» биэс байыас тыыннаах хаалла. Хомойуох иһин, хамандыыр бастакынан, «кыргыһыыга» оҕунна. Маны барытын кылаабынай ыстаап үөһэттэн көрөн олорор.

Икки хамаанда утарыта киирсиигэ күүрээннээх тургутууну аастылар. Хас биирдии хамаанда бэйэтин бастыҥ хаачыстыбатын, мындыр өйүн, сымса хамсаныыларын көрдөрдө. «Боотур» хамаанда үчүгэй координациятынан уонна стратегическай толкуйунан соһутта, бу кинилэргэ табыгастаах позициялары ыларга уонна утарылаһааччылар атаакалыыр дьайыыларын ситиһиилээхтик тохтоторго кыаҕы биэрдэ.

Хамандыыр сыанабыла

«ВОИН» киин хамандыыра Андраник Гаспарян күрэхтэһиигэ хамаандалар үлэлэрин үрдүктүк сыаналаата, Саха сирин хамаандатын тулуурун уонна стратегическай ньымаларын бэлиэтээтэ. Кини оҕолор марш-бросоктарын уонна кирсии кэмигэр түргэн-тарҕан туттунууларын, мындыр өйдөрүн тоһоҕолоон эттэ. Ону тэҥэ кини Хабаровскайтан кэлбит хамаандаҕа сүбэлэри биэрдэ, кинилэр сыыһаларын-халтыларын бэлиэтээтэ.

«Биһиги дьиҥэ саарбахтаабыппыт, ол эрээри эһиги тургутууну дьоһуннук, хорсуннук аастыгыт. Саха сирин хамаандата — маладьыастар. Быһаарыыны ылынаат, 1,5 км диэри өстөөх суоҕун билэн, суол быһа охсуһуутугар диэри марш-бросок оҥордо. Онтон оборонаҕа сыппыттара. Хабаровскай сыыһата — хамаанда бэриллээтин иккилии-үстүү буолан бииргэ сырыттыгыт. Бу дьиҥнээх сыал буолар. Дьоһун киирсиини көрдөрдүгүт. Эһиэхэ махтал!» — диэн Андраник Гаспарян эттэ.

Күрэхтэһиилэр кэмнэригэр курсаннар төһө бэлэмнээхтэрин, хамаанданан үлэлэрин уонна маастарыстыбаларын көрдөрдүөхтэрэ. Күрэхтэһии биир уратытынан 25 квадратнай килэмиэтир иэннээх уустук сиргэ ыытыллыыта буолар. Хамаандалар тактическай бөлөхтөргө арахсан, лазертакка аналлаах сибээһи туһанан усулуобунай өстөөҕү «суох оҥоруохтаахтар». «Геоскан» тэрилтэни кытары бииргэ үлэлээһин онлайн-видеотрансляция дьиҥнээх бириэмэҕэ учуоттуур систиэмэни тэрийэргэ кыаҕы биэрдэ.

Данил Хохлов, «Боотур» хамандыыра:

— Бастакы күн бэртээхэйдик ааста. Биһигини ойуур саҕатыгар илдьэн хаалларбыттара, син өр сыппыппыт, хамаанданы кэтэспиппит. Онтон ыйыллыбыт сиргэ диэри марш-бросок оҥорбуппут. Өстөөхтөрбүтүн көрсөн «киирсии» саҕаламмыта. Утарылаһааччыларбыт күүстээхтэр, биһиэхэ дьоһуннаах утарсыыны оҥордулар. Биһиги уон киһиттэн биэс киһини — хамандыыры, БПЛА операторын, икки штурмовигы уонна снайперы сүтэрдибит. Утарылаһааччыларбыт тоҕус киһини сүтэрдилэр, хамандыыр эрэ хаалла.