Буойун-суруналыыстары кэриэстээтилэр

Кыайыы 80 сылын көрсө Бэчээт дьиэтин искибиэригэр Аҕа дойду сэриитигэр кыттыбыт буойун-суруналыыстары кэриэстээтилэр. Үөрүүлээх тэрээһиҥҥэ үлэ, тыыл бэтэрээннэрэ, сэрии кэмин оҕолоро, бэтэрээн-суруналыыстар, үлэлии сылдьар суруналыыстар кытыннылар.

Сэрии ыар сылларыгар сытыы бөрүөлэрин ыстыыкка солбуйан, Саха сириттэн 139 суруналыыс уонна бэчээт эйгэтин үлэһитэ Ийэ дойдуну көмүскүүр ытык иэһин дьоһуннук толорбуттара. Кинилэр ортолоругар  Сэбиэскэй Сойуус Дьоруойа, Кыайыы саллаата, буойун-суруналыыс Николай Алексеевич Кондаков сырдык мөссүөнэ баар. Кини, биир идэлээх суруналыыс доҕотторун кытары, норуокка көҥүлү, эйэлээх олоҕу турууласпыт кыһатын дьолунан ааҕара.

Үөрүүлээх тэрээһиҥҥэ мустубут дьоҥҥо Саха араадьыйатын Көмүс пуондатыттан буойун-суруналыыс Николай Кондаков 1969 сыллаахха эппит тыыннаах куолаһын иһитиннэрдилэр.

Маны тэҥэ, Кыайыыны сулус оҥостон, хорсуннук кыргыспыт буойун-суруналыыстар кэккэлэригэр Берлиҥҥэ тиийэ сэриилэспит, инники кирбиигэ сибээһи хааччыйбыт, буойун-суруналыыс Феодосий Семенович Донской рейхстаг  эркинигэр аатын суруйан хаалларбыт түгэнин бэйэтэ кэпсээбитин Саха араадьыйатын Көмүс пуондатыттан иһитиннэрдилэр.

18 буойун-суруналыыс кыргыһыы толоонугар охтубуттара, олохторун толук биэрбиттэрэ. Кинилэр кэриэстэригэр суруналыыстар 1 мүнүүтэ саҥата суох турдулар.

Салгыы инновация, сыыппара сайдыытын, инфокоммуникационнай технология миниистирин солбуйааччы Александр Федотов, СӨ Суруналыыстарын сойууһун бэрэссэдээтэлэ, «Саха» НКИХ генеральнай дириэктэрэ, норуот дьокутаата Олег Марков, «Сахабэчээт» генеральнай дириэктэрэ, «Өлбөт үйэлээх полк» уопсастыбаннай хамсааһын эрэгийиэннээҕи ыстаабын салайааччы Ньургуйаана Стручкова, «Кэскил» оҕо кыһатын дириэктэрэ Ольга Семенова, «Сахамедиа» генеральнай дириэктэрэ Виктор Колесов, култуура миниистирэ Афанасий Ноев, норуодунай суруйааччы, «Чолбон» сурунаал бэтэрээнэ Сэмэн Тумат, СӨ култууратын үтүөлээх үлэһитэ, «Саха сирэ» хаһыат бэтэрээнэ Николай Крылов тыл эттилэр.

«Сахабэчээт, «Кэскил» үлэһиттэрэ байыаннай таҥаһы таҥнан тахсан, сэрии саҕанааҕы ырыалары ыллаатылар. Хуору СӨ норуодунай артыыһа Алексей Калининскай салайда. 

Мустубут дьон буойун-суруналыыстар мемориалларыгар аалай кыһыл гвоздика дьөрбөлөрүн уурдулар.

Кыайыы иһин олохторун толук уурбут саха буойун-суруналыыстарыгар сүгүрүйэбит. Кинилэр ааттара боруонсаҕа уонна гранитка, кинигэҕэ уонна айымньыга үйэлэргэ хаалар. Кинилэр ааттарын уулуссалар, болуоссаттар уонна оскуолалар сүгэллэр. Буойун-суруналыыстар дьоһун ааттара Саха сирин суруналыыстыкатын  килбиэннээх суолугар уонна дойду устуоруйатыгар кыһыл көмүс буукубанан суруллан хаалаллар.

Кыайыыны аҕалсыбыт, дьоллоох олох иһин олохторун толук уурбут саха ньургуннарыгар, буойун-суруналыыстарга,  сүгүрүйэбит, махтанабыт!Кинилэр ааттара үйэттэн-үйэҕэ дьоһуннук ааттана, кэлэр көлүөнэҕэ кэпсэнэ туруохтара!