Буойун төрөөбүт Анаабырыгар кылгас уоппускаҕа кэллэ

«Бүгүн сайыҥҥы сандаархай күҥҥэ Анаабырбытыгар үөрүүлээх түгэнинэн, былырыын күһүн балаҕан ыйын бүтэһигэр быстах хомуурга ыҥырыллан барбыт байыаспыт кылгас кэмнээх уоппускатын ылан кэлбитэ буолла», — диэн «Анаабыр уоттара» улуустааҕы хаһыаттан Гуннара Байгильдина иһитиннэрэр.

— Бу курдук күнүс авиапорпутугар «Север» диэн позывнойдаах хорсун уолбутун Сааскылаах орто оскуолатын “Бойцы Арктики” байыаннай-патриотическай кулууп уолаттара, кыргыттара былаахтарын тэлимнэтэн, арыылаах алаадьылаах, сибиэһэй балыктаах көрүстүлэр, үтүө холобур оҥостоллорун эттилэр. Эдэркээн байыаспыт дойдутугар кэлбитинэн бастатан, алгыстаах алаадьынан сирин-уотун күндүлээтэ.

Улуус баһылыга Эдуард Платонов эҕэрдэ тылыгар олохтоохтор байыаннай дьайыыга сылдьар уолаттарынан киэн тутталларын, төрөөбүт сиригэр, тапталлаах чугас дьонугар Үрүҥ Хайаҕа сынньанан күүс-уох ылан барарыгар баҕаран туран, улуус дьаһалтатын аатыттан алгыстаах харысхалы, чаҕылхай хаартыскалардаах халандаары бэлэх уунна.

Онтон бары бииргэ өйдөбүнньүк хаартыскаҕа түстүлэр, “Север” позывнойдаах уолбутугар төрөппүт аҕатын, эдьиийдэрин, олохтоохтор үтүө сыһыаннарыттан сэниэтигэр сэниэ, ахтылҕаннаах айылҕатыгар бултанан, сынньанан барарыгар баҕардыбыт.