Буойуттарбытыгар тыын суолталаах көмөҕө – күүскэ турунуоҕуҥ!
![](https://sakha-sire.ru/wp-content/uploads/2023/07/img-20230712-wa0029-1024x596.jpg)
Ил Дархан Айсен Николаев дьаһалынан Украина уонна Арассыыйа кыраныыссатын аттыгар тэриллэн үлэлии турар өрөспүүбүлүкэ байыаннай сулууспалаахтарыгар көмөнү оҥорор Тирэх пууннара ыытар үлэтин түмүгэр буойуттарбытыгар тыын суолталаах араас көмө суһаллык кэмигэр тиэрдиллэ турар.
Өлүөхүмэ улууһуттан Тирэх пууҥҥа иккиһин баран үлэлээн кэлбит волонтер Алексей Александрович Митюков ол туһунан хаһыат саайтын ааҕааччыларыгар кэпсээтэ.
— Тирэх пууҥҥа бу иккиһин тиийэн үлэлээһиним. Бастакы сырыыбар Киндигир нэһилиэгин баһылыга Василий Неустроевы кытта олунньуга баран үлэлээбиппит. Онтон ыам ыйын 4 күнүгэр Тирэх пууҥҥа тиийбитим уонна үлэлээн бүтэммин, пуунтан арахпытым билигин нэдиэлэттэн орто.
Тирэх пууҥҥа үлэлии тиийдэххэ, өрөспүүбүлүкэ бары пууннарын үлэлэрин салайар Алексей Юрьевич Саранцев дьаһалыгар киирэҕин. Байыаннай эпэрээссийэҕэ кытта сылдьар Саха сирин буойуттарыгар туох баар көмө, өйөбүл үлэлэрин барытын РФ Бэрэсидьиэнигэр СӨ Бастайааннай бэрэстэбиитэлэ — СӨ Бырабыыталыстыбатын бэрэссэдээтэлин бастакы солбуйааччы Андрей Сандаминович Федотов сүрүннүүр.
Буойуттарбытыгар тыын суолталаах көмөлөрү оҥорууга Арассыыйа ханнык да эрэгийиэниттэн саамай Саха сирэ эрэ күттүөннээхтик уонна утумнаахтык көмөлөһө олорор. Ол курдук, биһиги өрөспүүбүлүкэбититтэн тепловизордар, квадрокоптердар, квадроцикллар, коллиматордар, байыаннай усулуобуйаҕа наадалаах таҥас-сап, бородуукта уо.д.а. барыта тиһигин быспакка кэлэр.
Гуманитарнай көмө кэллэ даҕаны биһиги, Тирэх пуун үлэһиттэрэ, тута буойуттарбытыгар, подразделениелар хамандыырдарыгар сибээскэ тахсаммыт тутатына ким туохха наадыйарынан сайаапка хомуйабыт. Ол кэннэ илдьэн биэрэбит эбэтэр инники кирбии аттыгар ханнык туочукаҕа көрсүһэн биэрэри быһаарсабыт.
Инники кирбиигэ мээнэ киирэр кутталлаах, ол чугаһыгар тиийдэххэ даҕаны бэрт түргэнник төннө охсуоххун наада. Буойуттар сороҕор биһиги этэр туочукабытыгар тахсаллара да улахан уустуктардаах буолар. Ол иһин табыгастаах суолу көрдүүргэ тиийиллэр — көмөнү хайаан да тиэрдиллиэхтээх. Ити көмөттөн элбэх буойун олоҕо тутулуктааҕын өйдүүбүт. Көмө көдьүүһэ улахан – ол түмүгэр элбэх уолаттарбыт олохторо быыһанна. Онон Ил Дархан, өрөспүүбүлүкэбит салалтата, улуустарбыт, нэһилиэктэрбит бу курдук көмөнү ыыта туруулара олус наадалааҕын байыаннай дьайыыга сулууспалыыр уолаттарбыт уонна биһиги, Тирэх пууннарга үлэлээбит дьон, үчүгэйдик билэбит.
Өлүөхүмэ улууһугар үлэлиир Волонтер киинэ буойуттарга наадалаах үбү-харчыны, көмө баһыылкалары хомуйан ыытыыта салҕана турар. Буойуттарбыт балаһыанньаларын өйдөөммүт бары биир сомоҕо курдук түмсүүлээхтик маннык көмөлөһүүбүт саамай сөптөөх уонна тыын суолталаах. Онон буойуттарбытыгар тыын суолталаах көмөҕө – күүскэ турунуоҕуҥ!
![](https://sakha-sire.ru/wp-content/uploads/2023/07/img-20230712-wa0029.jpg)
![](https://sakha-sire.ru/wp-content/uploads/2023/07/img-20230712-wa0028.jpg)
Сообщить об опечатке
Текст, который будет отправлен нашим редакторам: