Буоксаҕа олимпийскай чөмпүйүөн Олег Саитов маастар-кылаас ыытыаҕа

Сарсын, кулун тутар 18 күнүгэр, Арассыыйа успуордун үтүөлээх маастара, буоксаҕа олимпийскай оонньуулар икки төгүллээх чөмпүйүөнэ Олег Саитов Саха сирин буоксаҕа сүүмэрдэммит хамаандатыгар уонна эдэр спортсменнарга маастар-кылаас ыытыаҕа. Тэрээһин «Муус устар» ыччат бэстибээлин чэрчитинэн ыытыллар диэн СӨ успуорка уонна физическэй култуураҕа министиэристибэтин пресс-сулууспата иһитиннэрэр.

«Маннык маастар-кылаастарга сылдьан эдэр спортсменнар сыал-сорук туруорунуохтара, иккис тыыннара аһыллыаҕа. Олег Элекпаевич курдук дьон кыайыы энергетикатынан киһини иитэллэр», —диэн Ил Түмэн ыччакка, физическэй култуураҕа уонна успуорка бастайааннай кэмитиэт бэрэссэдээтэлэ Георгий Балакшин этэр.

Маастар-кылаас сарсын Дьокуускайга «Өрөгөй» успуорт комплексыгар 17:00 чаастан саҕаланар.