«Буостаттан» эрийбиттэрин кэннэ Нерюнгри олохтооҕо муспут харчытын сүтэрбит

Нерюнгри улууһун 26 саастаах олохтооҕор буоста үлэһитэ буолабын диэн эр киһи эрийэн, сурук кэлбитин, ону ылыахтааҕын туһунан эппит.

Эдэр киһи суругу электроннай көрүҥүнэн ылара табыгастааҕын эппитигэр, билбэт киһитэ  телеграмҥа «Сервис доставки» диэн ааттаах боту булан, онно бэлиэтэнэригэр сүбэлээбит.

Эмсэҕэлээччи бу сорудаҕы толорбутун кэннэ, кини электроннай аадырыһыгар «Госуслуги» портаалга тус кабинетын алдьаппыттарын туһунан сурук кэлбит. Онтон портал сымыйа үлэһитэ эрийэн, түөкүннэр кини аатыттан араас дьыаланы оҥорорго дэбиэриннэс оҥотторбуттарын туһунан эппит. Салгыы кэпсэтиигэ Киин Баан уонна ФСБ сымыйа үлэһиттэрэ кыттыспыттар.

Эдэр киһини терроризмҥа көмөлөстүҥ диэн холуобунай эппиэтинэһинэн куттаан, кинилэр этиилэрин толорору модьуйбуттар. Түмүгэр, эмэсэҕэлээччи түөкүннэр этиилэринэн салайтаран,  счеттарыгар 158 000 солк. ыыппыт.

«Билбэт дьонҥҥо, туора счеттарга харчыны ыытар сатаммат диэн гражданнар болҕомтолорун өссө төгүл тардабыт, – диэн Нерюнгри улууһун ИДьМ сулууспатын отдела иһитиннэрэр.