Бурденко аатынан байыаннай госпитальга стажировкаланыахтара

Саха сирин быраастара Бурденко аатынан кылаабынай байыаннай госпитальга стажировкаланаллар.

Кэлэр нэдиэлэ саҥатыгар Хаҥалас оройуонун киин балыыһатын кылаабынай бырааһа Артур Протодьяконов салалтатынан Саха сирин быраастарын биригээдэтэ  Бурденко аатынан байыаннай госпитальга стажировкаҕа барыаҕа. Бу туһунан брифиҥҥэ СӨ Бырабыыталыстыбатын вице-премьерэ Ольга Балабкина иһитиннэрдэ. Стажировка кэнниттэн быраастар госпиталларга үлэлиэхтэрэ.

«Бу байыаннай госпитальга бастакы стажировкаланыы. Мэдиссиинэҕэ наадалаах көмөнү оҥороору, саҥаттан-саҥа сатабылга, билиигэ үөрэнэбит«, — диир кини.

Бырбыыталыстыба бэрэссэдээтэлин солбуйааччы быраастар госпиталларга мэдиссиинэ көмөтүн оҥорорго көхтөөхтүк кытталларын бэлиэтиир: эпэрээссийэлииллэр, бааһырбыттары бэрэбээскилииллэр, сүбэ-ама биэрэллэр, туруоруллубут сыалы-соругу ситиһэллэр.

Санатан эттэххэ, Ил Дархан Айсен Николаев сорудаҕынан, Уһук Илин уонна Соҕуруу федеральнай уокуруктар госпиталларыгар Саха сирин быраастарын биригээдэлэрэ тэриллэн былырыын сэтинньитэн үлэлииллэр. Маннык көмөнү оҥорууну Саха сирэ эрэгийиэннэртэн биир бастакынан саҕалаабыта.

СӨ Ил Дархан уонна Бырбыыталыстыба пресс-сулууспата