Буруйу боруостуур холуонньаларга тимир-бетон сыахтара үлэлииллэр

РФ Накаастабылы толорор федеральнай сулууспатын Саха сиринээҕи управлениетын (УФСИН) оҥорон таһаарар сулууспатын үлэһиттэрэ сууттаммыттар үлэлээх буолалларыгар, хамнастарын таһыма үрдүүрүгэр үлэни ыыталлар. Бу туһунан  РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрэр.

Ол курдук, буруйу боруостуур 6-с уонна 7-с №-дэрдээх холуонньаларга бетонтан блоктары оҥоруу үлэ биир сүрүн хайысхатынан буолар. Оҥорон таһаарыы хаачыстыбата стандартка уонна нуормаҕа эппиэттиир, хантараактар усулубуйалара тутуһуллар, онон сыллата сакаас элбиир.

Бу сылга холуонньалар «Администрация Ленского бассейна внутренних водных путей», «РФА-Инвест», «Сельстрой», «Интер», «Спецснаб» тэрилтэлэргэ барыта холбоон 17 мөл.солк. суумалаах хантараагынан сакаастары толордулар.

Сыахха үлэлиир буруйдарын боруостуур дьон 317, 318 №-дээх училищеларга үөрэнэллэр. Манна ылыммыт билиилэрин туһанан, холуонньаттан тахсан баран үлэҕэ киириэхтэрин сөп.