“Бутлегердары” сойуолаһыы

Ааспыт сууккаҕа полиция учаастактааҕы боломуочунайдара уонна ПДН иниспиэктэрдэрэ “Бутлегер” эпэрээссийэни ыыттылар.

Дьокуускайга Маяковскай, Орджоникидзе, Бестужев-Марлинскай, Кальвица, Якутская, Жорницкай, Семен Данилов уулуссаларыгар, Хатыҥ Үрэх шоссетыгар уонна Жатайга маҕаһыыннарга арыгылааһыны утары сокуону кэһии тахсыытын бэлиэтээтилэр.

Кинилэри эппиэккэ тартылар. Холобура, “Ремикс” маҕаһыын 35 саастаах атыыһыта сокуоннай сааһын туола илик оҕоҕо атыылаабыт. ПДН иниспиэктэрэ бу дьахтарга РФ Административнай кэһиилэргэ кодексын 14.16 ыст. 2.1. чааһынан боротокуол толорбут. “День и ночь” маҕаһыын 53 саастаах атыыһыта эмиэ итинник оҕоҕо итирдэр утаҕы биэрбит.

Тоҕус эргиэн тэрилтэтигэр кэһии баарын таһынан, полицейскайдар “ көлүөһэ үрдүттэн алкомаркеттаах”  23 саастаах бутлегеры туппуттар. Киниэхэ эмиэ тустаах кодекс 14.17.1. ыст. 1 ч. боротокуол толоруллубут. Массыынаҕа тиэйэ сылдьыбыт арыгыта былдьаммыт.

Эпэрээссийэ салҕанар.

ИДьМ Саха Өрөспүүбүлүкэтигэр пресс-сулууспата