Бүгүн — Аҕа дойду тас өттүгэр ытык иэстэрин толорбут интернационалист буойуттар күннэрэ

Сыл аайы олунньу 15 күнүгэр Арассыыйаҕа Аҕа дойду тас өттүгэр ытык иэстэрин толорбут интернационалист буойуттар күннэрэ бэлиэтэнэр.

Бу күн 1989 сыллаахха Афганистантан Сэбиэскэй Сэбилэниилээх күүстэри таһаарыыга анаммыта.

«Афганистаҥҥа буолбут түбэлтэлэр Ийэ дойдуга таптал уонна байыаннай андаҕарга бэриниилээх буолуу холобура. Дойду уонна өрөспүүбүлүкэ салалтата бэтэрээннэри араас сэриилэргэ кыттыбыттарынан араарбат, кинилэри барыларын дьоруойдар диэн ааҕар. Дойдуларыгар төннүбүт бэтэрээннэр дьиэ кэргэттэригэр тирэх уонна ыччакка сүбэһит буолбуттара киһини чахчы сөхтөрөр», — диэн СӨ Ил Дархана Айсен Николаев  эттэ.

Бу өйдөбүнньүк күн статуһа Арассыыйа Бэрэсидьиэнэ Владимир Путин көҕүлээһининэн 2010 сыл сэтинньи 29 күнүнээҕи Федеральнай сокуонунан олохтоммута. Бу күн «афганецтары» эрэ буолбакка, Аан дойду иккис сэриитин кэнниттэн ССРС уонна Арассыыйа тас өттүгэр 30-тан тахса сэриилэргэ уонна эйэни олохтуур миссияларга кыттыбыт бары байыаннай сулууспалаахтары, ону тэҥэ гражданскай исписэлиистэри — быраастары, инженердэри, сүбэһиттэри ахтан ааһаллар.

«Олунньу 15 күнэ – ураты күн, биһиги уопсастыбабыт эйэни көмүскээн, Аҕа дойду тас өттүгэр Ийэ Сир араас муннуктарыгар ытык иэстэрин толорбут буойуттарбытыгар ытыктабылын биллэрэр. Бу күн илиилэригэр саалаах дойду интэриэһин көмүскээбит бары байыаннайдары түмэр», — диэн бэлиэтээтэ «Арассыыйаҕа Афганистан бэтэрээннэрин сойууһа» уопсастыбаннай тэрилтэ Саха сиринээҕи салаатын бэрэссэдээтэлэ, Афганистан сэриитин кыттыылааҕа Валерий Лютый.

Саха сирин ыччат дьыалаларыгар уонна социальнай коммуникацияларга миниистирэ, анал байыаннай дьайыы кыттыылааҕа Петр Шамаев этэринэн, уопсастыба ыччаты Ийэ дойду иһин сэриилэспит бэтэрээннэр дьоруойдуу холобурдарыгар иитиэхтээх.

«Бу күн биһиги Ийэ дойдубутун уонна  эйэлээх олохторун көмүскээбит хас биирдии интернационалист-буойуҥҥа махталбытын биллэрэбит. Сэрии эрэйин ааспыт киһи буоларым быһыытынан, хас биирдии саллаат уонна офицер, ол иһигэр кинилэр дьиэ кэргэттэрэ тугу туораабыттарын өйдүүбүн. Биһиги сорукпут — буойуттарбыт хорсун быһыыларын умнуо суохтаахпыт уонна ыччаппытын маннык дьон холобуругар иитиэхтээхпит», — диэтэ миниистир.

Санаттахха, Афганистан сэриитигэр Саха сириттэн 874 киһи кыттыбыта, онтон 24 киһи орто эчэйиилээх бааһырыыны ылбыта, 14 киһи сэрии инбэлиитэ буолбута, 10 саха буойуна кыргыһыыга охтубута. Сиһилии: https://www.sakha.gov.ru/news/26263