Бүгүн — Арассыыйаҕа оҕо тэлэбиидэнньэтэ төрүттэммит күнэ

Бүгүн, тохсунньу 18 күнүгэр, Арассыыйаҕа оҕо тэлэбиидэнньэтэ тэриллибит күнэ бэлиэтэнэр.

Бу күн 1963 сыллаахха ССРС Киин тэлэбиидэнньэтэ оҕолорго анаан сүрүн эрэдээксийэ бырагырааматын тэрийбитэ. 1970-с уонна 1980-с сыллар усталарыгар судаарыстыбаннай араадьыйа уонна тэлэбиидэнньэ күүскэ тэриллэн барбыта. Бу кэмтэн ыла оҕолорго анаммыт иһитиннэрэр ханааллар, ону тэҥэ бырагыраамалар, киинэлэр уонна ойуулуктар ахсаана элбээбитэ. Эдэр көрөөччүлэр күөх экрааҥҥа араас ойуулуктары күүтэр-маныыр буолбуттара.

Баччааҥҥа диэри ахтыллар саамай биллэр оҕолорго аналлаах биэриилэринэн «Ералаш», «В гостях у сказки» уонна «Спокойной ночи, малыши» буоллаллар. Ол курдук, « В гостях у сказки» бырагыраама 1970 сылтан 1990- с сылларга диэри эпииргэ тахсыбыта. Бырагырааманы үөрэх дьылын устата 2 нэдиэлэҕэ биирдэ көрдөрөллөрө. Кэлин 1980-с сыллартан аата уларыйбыта — «В мире сказок и приключений», оттон 90-с сыллартан – «Зазеркалье» буолбута. 1 чаас 45 мүнүүтэ устата оҕолор киинэ-остуоруйа көрөллөрө, киинэни кытта сибээстээх чахчылары кытта билсэллэрэ. Бырагырааманы Валентина Леонтьева, Татьяна Веденеева, Ангелина Вовк уонна Денис Матросов ыыталлара.

Оттон Саха сирин устуоруйатыгар киирэр биир бэлиэ түгэнинэн оҕолорго аналлаах “Тооку” ханаал үлэтин саҕалаабыта. Былырыын Саха сиригэр ыытыллар Бүтүн Арассыыйатааҕы Креативнай нэдиэлэ чэрчитинэн уонна Оҕо көмүскэлин күнүн көрсө ыам ыйын 31 күнүгэр оҕолорго аналлаах “Тооку” ханаал үлэтин саҕалаабыта. “Тооку” ханаал суукканы эргиччи үлэлиир. Манна Арассыыйа тылбаастаммыт, Саха сиригэр оҥоһуллубут ойуулуктар, иитэр-сайыннарар биэриилэри көрдөрөллөр.