Бүгүн «Азия оҕолорун» уотун эстафетатын түмүктүүр түһүмэҕэ ыытыллыаҕа

Бэс ыйын 26  күнүгэр Дьокуускайга «Азия оҕолоро» норуоттар икки ардыларынааҕы спортивнай оонньуу уотун эстафетата түмүктүүр түһүмэҕэ ыытыллыаҕа. 

Сарсыарда 10 чаастан Кыайыы болуоссатыттан саҕаланыаҕа. Куорат киин уулуссаларынан баран, күнүс 12 чааска Доҕордоһуу болуоссатыгар тиийэн түмүктэниэҕэ.

Эстафетаҕа 74 факелы көтөҕөөччү, ол иһигэр Ил Дархан Айсен Николаев, «Азия оҕолорун» норуоттар икки ардыларынааҕы  кэмитиэтин бэрэсидьиэнэ Владимир Максимов, Арассыыйа Олимпийскай кэмитиэтин бэрэсидьиэнэ Станислав Поздняков, Дьокуускай мээрэ Евгений Григорьев, «Азия оҕолорун» урукку кыттыылаахтара, уо.д.а. сүүрүөхтэрэ.

Үөрүүлээх быһыыга-майгыга сиэрин-туомун толорон баран, уоту «Туймаада» стадиоҥҥа аҕалыахтара.

Санатар буоллахха, оонньуулар уоттара Өлүөнэ очуостарыгар саҕыллан баран, 100 күн устата Саха сирин бары улуустарын кэрийэн, барыта 37 тыһыынча килэмиэтир уһуннаах сири барда. Уоту 450 факелы көтөҕөөччү күөрэччи тутан, сүүрбүттэрэ, 900 волонтер арыаллаабыттара.

Дьэ, эстафета түмүктэнэр чааһа кэллэ! Онтон оонньуулар аһыллыыларыгар стадиоҥҥа күлүбүрүү умайыаҕа.