Бүгүн байыаннай сулууспалаахтарга көмө ыытыллыаҕа

Бүгүн «Якутия с тобой!»  уопсастыбаннай хамсааһын ыстааба Бүтүн Арассыыйатааҕы #МЫВМЕСТЕ аахсыйа иитинэн, Саха сириттэн быстах хомуурга барбыт  дьоҥҥо   көмөнү ыытыаҕа. Бу туһунан брифинг кэмигэр ыстаап салайааччыта  Айыл Дьулурха иһитиннэрдэ.

«Билигин Арассыыйа Оборуонатын министиэристибэтин көмөтүнэн Почта нөҥүө мобилизацияламмыт дьоҥҥо аадырыстаах баһыылканы ыытар кыах баар буолла», – диэтэ  Айыл Дьулурха.

Ыстаап салайааччыта «Якутия» авиахампаанньаҕа Саха сириттэн быстах хомуурга сылдьар биир дойдулаахтарбытыгар көмөнү босхо илдьэллэригэр махталын биллэрдэ.

Санатан эттэххэ, байыаннай сулууспалаахтар аймахтара  баһыылканы уонна суругу Арассыыйа Почтатын нөҥүө маннык аадырыска ыытыахтарын сөп: 103400, Москва-400, уонна байыаннай чаас нүөмэрин ыйаҕыт.