Бүгүн — Бөтүрүөп күнэ

От ыйын 12 күнэ — Бөтүрүөп таҥара күнэ. Бу күн иччилэр (абааһылар) мунньахтыыр күннэрэ диэн сахалар итэҕэйэллэрэ. Ол мунньахтаан, быйыл ким төрүүрүн, өлөрүн, ким хайдах дьылҕалаах буоларын быһаарсаллара үһү.

Православнай итэҕэлгэ бу күн сибэтиэй апостоллар Петрга уонна Павелга ананар. Кинилэр Иисус Христос бастакы үөрэнээччилэрэ буолаллар. Христанство итэҕэлин тарҕаппыттара, элбэх таҥара дьилэрин туттарбыттара. Кинилэри Римҥэ муҥнаан өлөрбүттээр.

Оттон сахалар православнай итэҕэл бырааһынньыктарын айылҕа, күн-дьыл хаамыытынан бэйэлэрин олохторугар сыһыаран, бэлиэтииллэрэ. Ол курдук, Бөтүрүөп күн окко киирбэттэрэ, түүн сылдьыбаттара, айдаарбаттара. Бу күн окко өрүүллэрэ, тоҕо диэтэр, мунньахтыыр күннэригэр хотуур суолун таһаардахха, абааһы уола сырсар диэн итэҕэйэллэрэ.

Өбүгэлэрбит ходуһаҕа Бөтүрүөп таҥара иннинэ эбэтэр ый ортотун аһардан баран, от сиппитин, сибэккилэммитин кэннэ киирэр үгэстээхтэрэ.  От охсуутун Бөтүрүөпкэ диэри саҕалаабатахтарына, абааһылар мунньахтарын (от ыйын 12 күнүн) аһардан баран, охсоллоро. Окко маассабайдык Борокуоппайап күнүттэн киирэллэрэ.

Абааһылар мунньахтыыр күннэрин сорохтор биир күн, сорохтор үс түүннээх күн мунньахтыыллар үһү дииллэр эбит. Онуоха от ыйын 13-гэр салгыны мээнэ хамсаппакка, айдаарбакка, чуумпутук сылдьыллыахтаах. Дьиэҕэ-уокка уһуктааҕы-биилээҕи мээнэ туттумаҥ, сэрэниҥ диэн буолар.
Бу күн күүстээх үлэ, үөхсүү, этиһии бобуллар. Куһаҕаны санаатахха, абааһылар истиэхтэрэ диэн сэрэтэллэр.