Бүгүн боксер Василий Егоров аан дойду чөмпүйэнээтигэр бастакы киирсиитэ буолар

Бүгүн, ыам ыйын 4 күнүгэр, Василий Егоров Узбекистаҥҥа ыытыллар буоксаҕа эр дьоҥҥо аан дойду чөмпүйэнээтигэр бастакы киирсиитэ буолар. Саха боксера Турцияттан сылдьар Гюмюш Саметы кытта күөн көрсүөҕэ.

Василий Егоров бу күрэхтэһиигэ 51 киилэҕэ диэри ыйааһыҥҥа кыттар. Киирсии 17 чаастан олохтоох бириэмэнэн саҕаланыаҕа. Күрэхтэһиини «Матч- Боец» телеханаалга көрүөххэ сөп.

Санатан суруйдахха, аан дойду чөмпүйэнээтэ муус устар 30 күнүттэн ыам ыйын 14 күнүгэр диэри ыытыллар. Василий Егоров Арассыыйа сүүмэрдэммит хамаандатын састаабыгар дойду билиҥҥи чөмпүйүөнэ быһыытынан киирбитэ.

Чөмпүйэнээт рингэтигэр барыта 13 кэмпилиэк мэтээл оонньонуоҕа. Тэрийээччилэр иһитиннэрбиттэринэн, күрэхтэһии бириистээх пуондата — 5,2 мөл. дуоллар.