Бүгүн — Бүлүү өрүс күнэ

Бу күнү 2017 сылга дойдуга Экология сылыгар Бүлүүгэ буолбут экологтар улахан мунньахтарыгар бэлиэтииргэ ылыммыттара. Бүтэй Бүлүү, Сыа Бүлүү… Бүлүү өрүс былыр-былыргыттан өҥ хочолорунан, көмүс хатырыктааҕынан, баай булдунан, кылыгырас ыраас уутунан, кэрэ көстүүтүнэн аатырар.

Аан бастакытын экологическай бэстибээл быһыытынан 2014 сыл балаҕан ыйын 26 күнүгэр Дмитрий Макаров аатынан “Зеленый пояс Вилюя” экология пуондатын көҕүлээһининэн уонна Бүлүүтээҕи айылҕа харыстабылын инспекциятын, Бүлүү куорат дьаһалтатын өйөбүлүнэн ыытыллыбыта.

Санаттахха, 2017 сыллаахха “Бүлүү” уопсастыбаннай экологическай кэмитиэт өрөспүүбүлүкэтээҕи экологическай пуоруму тэрийбитэ. Онно Бүлүү өрүс күнүн күнэ-дьыла чопчу бигэргэммитэ. Онтон ыла ыам ыйын 25 күнүгэр өрөспүүбүлүкэҕэ Бүлүү өрүс күнүн бэлиэтиир үтүө үгэс олохтоммута.

Бу күн Бүлүү өрүс экологиятыгар сыһыаннаах араас тэрээһиннэр, куонкурустар, субуотунньуктар ыытыллаллар. Бүлүү бөлөх улуустарыгар биэрэк кытыытын ыраастааһын субуотунньуктара буолаллар.