Бүгүн Бүлүүгэ балыыһа саҥа комплекса үлэҕэ киирдэ

Бүгүн, олунньу 25 күнүгэр, Бүлүү улууһун олохтоохторугар ураты үөрүүлээх күн тосхойдо. Ол курдук, Бүлүү куоракка балыыһа комплексын бастакы уочарата үлэҕэ киирдэ. 

«Бүгүн аҥаардас Бүлүү улууһун олохтоохторугар эрэ буолбакка, өрөспүүбүлүкэ доруобуйатын харыстабыла өр күүппүт үөрүүлээх түгэнэ буолла», – диэн Айсен Николаев эҕэрдэ тылыгар эттэ.  Ил Дархан  иһитиннэрбитинэн, улуус олохтоохторо 90-с сыллартан саҥа балыыһаны туруорсубуттар. 2014 сыллаахха  оччолорго СӨ Бырабыыталыстыбатын бэрэссэдээтэлэ  Галина Данчикова өйөбүлүнэн маҥнайгы сыбаайалар түһэриллибиттэрэ уонна тутуу саҕаламмыта эрээри, кэккэ төрүөттэринэн тохтоон хаалбыта.

2018 сыллаахха Айсен Николаев Бүлүүгэ оробуочай сырыытынан кэлэ сылдьан, улуус баһылыга Сергей Винокуровтыын балыыһаны салгыы тутар варианнары дьүүллэспитэ. «Доруобуйа харыстабыла» национальнай бырайыакка баар доруобуйа харыстабылын бастакы сүһүөҕүн саҥардыы бырагырааматын көмөтүнэн тутуллар кыахтаммыта. Бу бырайыак РФ Бэрэсидьиэнэ Владимир Путин быһаччы өйөбүлүнэн, этиитинэн саҕаламмыта.

«Биһиги бүгүн уопсай блоктаах уонна хирургия отделениелаах балыыһаны үлэҕэ киллэрдибит. Бу саҕалааһын эрэ буолар. Быйыл Бүлүүгэ балыыһа иккис уочаратын тутуутун саҕалыахпыт.  2025 сылга комплекс барыта үлэлиэҕэ диэн эрэнэбин. Бүлүү улууһун бары олохтоохторугар үрдүк мэдиссиинискэй көмө оҥоһуллар буолбутуттан улаханнык үөрдүм. Бу —  дьон доруобуйата этэҥҥэ буоларын туһугар улахан ситиһии, хардыы буолар. Манна хирургическай эмтээһин бары көрүҥэ туһаныллара ааһан эндопротезирование эпэрээссийэтэ оҥоһуллар кыахтанна», – диэн Айсен Николаев эҕэрдэ тылыгар эттэ уонна эбийиэги туппут бары тутааччыларга махтанна. Бүлүүтээҕи  киин балыыһа кэлэктиибигэр  суһал массыына сэртипикээтин үөрүүлээх быһыыга-майгыга туттарда.

«РФ Бэрэсидьиэнэ Владимир Путин быһаччы сорудаҕынан үлэлиир доруобуйа харыстабылын бастакы сүһүөҕүн саҥардыы бырагырааматын көмөтүнэн уонна Ил Дархан Айсен Николаев Саха сиригэр доруобуйа уон сылын биллэрбитинэн биһиги өрөспүүбүлүкэбитигэр маннык үчүгэй балыыһалар үлэҕэ киирэллэр», – диэн  РФ Судаарыстыбаннай Дууматыгар доруобуйа харыстабылын кэмитиэтин бэрэссэдээтэлин 1-кы солбуйааччы Федот Тумусов эҕэрдэлээтэ уонна  РФ Судаарыстыбаннай Дууматын тустаах кэмитиэтин кырааматаларын уонна РФ Судаарыстыбаннай Дууматын дьокутаата Галина Данчикова аатыттан Махтал суруктары туттартаата.

Бүлүү улууһун баһылыга Сергей Винокуров улуус олохтоохторун ааттарыттан аныгы балыыһа бастакы уочарата үлэҕэ киирбитинэн махтал тылларын эттэ. Бу эбийиэк үлэҕэ киирэрин олохтоохтор 30-тан тахса сыл күүппүттэрин иһитиннэрдэ.  Саха АССР  уонна РФ үтүөлээх бырааһа, Саха сиригэр тыа сиригэр сүрэххэ бастакы эпэрээссийэни оҥорбут Никита Матвеев Бүлүүгэ саҥа балыыһаны тутар туһунан этиини 1989 сыллаахха киллэрбитин туһунан кэпсээтэ уонна Ил Дархан Айсен Николаевка улахан махталын эттэ.

Саҥа балыыһа ураты оҥоһуулаах. Блоктары галереялар ситимнииллэр. Уопсай блокка приемнай отделение, ас-үөл блога, таҥас сууйар сир-уот, рентген-диагностическай кэбиниэтэ, клинико-диагностическай лабораториялар, балааталар, быраастар кэбиниэттэрэ бааллар.  Балыыһа бастакы уочаратын дьиэтигэр хирургия отделениета баар, барыта 1200 кв м иэннээх. Куорпуска приемнай отделениелар,  рентген-кэбиниэтэ, лабораториялар, ас-үөл блога бааллар.  Саҥа эбийиэк аныгы мэдиссиинэ ирдэбиллэригэр бары өттүнэн толору эппиэттиир. Ол курдук, саҥа балыыһа үлэҕэ киирбитинэн  улууска хирургия эпэрээссийэтин көрүҥүн оҥоруу кэҥиэҕэ. Холобур, эндопротезирование эпэрээссийэтэ оҥоһуллар буолуоҕа.

Комплекс иккис уочарата «Доруобуйа харыстабыла» национальнай бырайыак чэрчитинэн, 2023-2025 сылларга тутуллуоҕа.  Бүгүҥҥү күҥҥэ бырайыактыыр докумуонун оҥорууга судаарыстыбаннай хантараак түһэрсиллибит. Балыыһа иккис уочаратыгар терапия, төрөтөр, сүрэх-тымыр, инфекционнай отделениелар баар буолуохтара.