Бүгүн Чурапчы улууһугар кутурҕан күнэ

Бүгүн Чурапчыга Кутурҕан уонна кэриэстэбил күнүгэр ”Ийэ уонна оҕо” мемориалыгар Чурапчы холкуостарын күүс өттүнэн хоту оройуоннарга көһөрүү 83 сылыгар анаммыт миитиҥҥэ улуус салалтата, көһөрүүгэ сылдьыбыт дьон, кинилэр оҕолоро, олохтоохтор көһөрүллүү ыар сылларыгар эрэйи-буруйу көрбүт биир дойдулаахтарын үтүө ааттарыгар сүгүрүйэр миитин сиэригэр-туомугар кытыннылар. 

Миитин кыттыылаахтара көһөрүүгэ сылдьыбыт биир дойдулаахтарын кэриэстиир кутурҕан күҥҥэ биир мүнүүтэ саҥата суох нөрүйэн турдулар.

Салгыы “Чурапчы алдьархайынан” ааттаммыт сут-кураан кэмигэр аччыктааһыны-хоргуйууну, тоҥууну, ыарыыны, көһөрүллүү эрэйин-кыһалҕатын эттэринэн-хааннарынан билбит биир дойдулаахтарын ахтан-санаан аастылар, Чурапчыга Кэриэстэбил томторугар көһүү сиэртибэтэ буолбут биир дойдулаах дьонноругар анаммыт Мемориалга сибэкки дьөрбөтүн уурдулар.

Миитиҥҥэ улуус дьокутааттарын сэбиэтин бэрэссэдээтэлэ Яков Оконешников, муниципальнай оройуон баһылыгын социальнай боппуруостарга солбуйааччы Мария Кронникова, Чурапчы нэһилиэгин баһылыгын социальнай боппуруостарга солбуйааччы Варвара Макарова, биир дойдулаахтара Альбина Иннокентьевна Поисеева уонна тыыл бэтэрээнэ Василий Дмитриевич Лукин, ыччат хамсааһынын чилиэннэрин уонна устудьуоннар бэрэстэбиитэллэрэ тыл этэн, көһөрүллүү курдук ыар дьайыылар аны хаһан да хатымматтарыгар, ааспыт тыйыс дьыллар тымныы тыыннара үүнэр ыччаппытыгар суоһаабатын диэн эттилэр, Чурапчы улууһун бу ыар сүтүгэ хаһан да умнуллубатын, хас биирдии улуус олохтооҕун сүрэҕэр, өйүгэр-санаатыгар өрүү тыыннааҕын бэлиэтээтилэр. Миитин уопсай хаартыскаҕа түһүүнэн түмүктэннэ диэн Чурапчы улууһун дьаһалтата иһитиннэрэр.

Ким да умнуллубат, туох да умнуллубат!