Бүгүн Дьокуускайга  “Алтай” ыччат ансаамбылын кэнсиэрэ

Бүгүн, ыам ыйын 13 күнүгэр 18.30 чаастан Суорун Омоллоон аатынан Опера уонна балет тыйаатырыгар  А.Ф.Березиков аатынан “Алтай” ырыа уонна үҥкүү ыччат судаарыстыбаннай ансаамбылын кэнсиэрэ буолуоҕа.

Артыыстар  гостуруол кэмигэр  Дьокуускай, Алдан, Нерюнгри, Магадан куораттарга уонна Магдагачи бөһүөлэккэ сылдьыахтара.

Ансаамбыл айар үлэтигэр үгэс буолбут үҥкүүлэр,  фольклорга олоҕурбут вокал-хореография композициялара, ону сэргэ үҥкүү уонна вокал ускуустубатын  аныгы хайысхалара киирэллэр.

Култуура тэрилтэлэрин  устудьуоннара састааптаах ансаамбыл сүрүн соругунан Алтай кыраайын норуоттарын үгэс буолбут фольклорун көрдөрүү, билиһиннэрии буолар.

“Алтай” Дьокуускайга Александр Твардовскай поэматынан Валерий Гаврилин “Дом у дороги” биир акталаах балетын уонна “Я Алтая почувствую душу” кэнсиэрин көрдөрүөҕэ.

Гостуруол РФ Култуураҕа министиэристибэтин Бүтүн Арассыыйатааҕы гостуруол-кэнсиэрт  былаанын чэрчитинэн тэрилиннэ.