Бүгүн Дьокуускайга «Крым сандал сааһа» диэн тэрээһин ыытыллыаҕа

Арассыыйа састаабыгар Крым уонна Севастополь киирбит күннэрин бэлиэтиир тэрээһиннэр Саха сирин бары оройуоннарыгар ыытыллыахтара. Маныаха викториналар, аахсыйалар, быыстапкалар, о.д.а. тэрээһиннэр буолаллара былааннанар.

Бэлиэ күҥҥэ анаммыт тэрээһин кулун тутар 15 күнүттэн онлайн-викторинанан саҕаламмыта. Онлайн-викторина Өксөкүлээх Өлөксөй аатынан Норуоттар Доҕордоһууларын дьиэтин саайтыгар ddnykt.ru онлайн киэбинэн кулун тутар 25 күнүгэр диэри ыытыллар. Оттон Национальнай ойуулуур-дьүһүннүүр мусуойга «Иван Айвазовский. История одной картины» диэн экскурсия уонна «По морям, по волнам» диэн арт-практикум буолуоҕа.

Итиэннэ киин куорат бибилэтиэкэлэригэр Крым уонна Севастополь Арассыыйа састаабыгар киирбиттэрин кэрэһэлиир кинигэлэринэн быыстапкалар турдулар.

Бүгүн, кулун тутар 17 күнүгэр, 16:00 чаастан Дьокуускайга Өксөкүлээх Өлөксөй аатынан Норуоттар Доҕордоһууларын дьиэтигэр  «Крымская весна. Мы вместе!» диэн аахсыйа-миитин буолуоҕа.

Сарсын, кулун тутар 18 күнүгэр, Кыайыы болуоссатыгар баар Севастополь дьоруой-куорат билиитэтигэр сибэкки дьөрбөтүн ууруохтара.