Өрөспүүбүлүкэ сүрүн харыйатын уота умайыа

Бүгүн, ахсынньы 1 күнүгэр, 16:00 чаастан Өрөспүүбүлүкэ болуоссатыгар сүрүн харыйа уота сандаарыа.

Бу күн эһигини муусуканан, кэрэ көстүүнэн толору, тапталлаах остуоруйа дьоруойдарын кытта истиҥ алтыһыылаах киэҥ бырааһынньык бырагыраамата күүтэр.

Тэрээһин саҕаланыан иннинэ Петр Ильич Чайковскай сүрэҕи-быары сылаанньытар айымньылара уонна үөрүүлээх-көтүүлээх Саҥа дьыллааҕы ырыалар иһиллиэхтэрэ.

Үүнэр көлүөнэ тыйаатырын артыыстара бары ыалдьыттарга үтүө настарыанньаны бэлэхтиир сэргэх шоуну көрдөрүөхтэрэ. Ураты болҕомто Тымныы Чысхааны уонна Кыыдаанннаах Кыһыны, ону тэҥэ Тымныы Оҕонньору уонна Хаарчаананы кытта көрсүһүүгэ ууруллуоҕа. Ыалдьыттар чаҕылхай остуоруйа дьоруойдарын, ол иһигэр үтүө санаалаах мамонтеногы уонна Саҥа дьыл кэрэ бэлиэтин – Тооку кулунчугу кытта кэпсэтэр кыахтаныахтара. Бары мустубут дьону итии чэйинэн уонна минньигэс какаонан күндүлүөхтэрэ. Тэрээһиҥҥэ мустуу 15:30 ч. саҕаланар.