Бүгүн – Оҕо уопсастыбаннай хамсааһынын күнэ

Саха сиригэр ахсынньы 5 күнүгэр ураты бырааһынньык бэлиэтэнэр – өрөспүүбүлүкэтээҕи Оҕо уопсастыбаннай хамсааһынын күнэ.

1992 сыл ахсынньы 5 күнүгэр Саха Өрөспүүбүлүкэтин оҕо уопсастыбаннай холбоһуктарын сойууһун сүлүөтэ тэриллибитэ. Холбоһук оччотооҕу Саха уобаластааҕы пионерскай тэрилтэтин утумнааччытынан буолбута.  Оҕолору биир санаанан түмэр соруктаах Саха Өрөспүүбүлүкэтигэр оҕону иитии бырагырааматын оҥорон ылыммыттара.

2013 сыллаахха өрөспүүбүлүкэ салалтатын өйөбүлүнэн, оҕо бары уопсастыбаннай холбоһуктарын түмэр “Дьулуур” оҕо хамсааһына тэриллибитэ. Эһиилигэр, 2014 сыллаахха СӨ Бэрэсидьиэнэ Егор Борисов ыйааҕынан ахсынньы 5 күнэ Оҕо уопсастыбаннай хамсааһынын күнүнэн биллэриллибитэ.

Арассыыйатааҕы “Бастакылар хамсааһыннара” уопсастыбаннай-судаарыстыбаннай хамсааһын бастакы олохтоох салаата бүтүн дойду үрдүнэн аан маҥнайгынан Дьокуускайга аһыллыбыта. Күн бүгүн улуус, куорат 35 олохтоох салаата, 653 бастакы сүһүөх салаа тэриллэн үлэлиир. Саха сирин үөрэнээччилэрэ “Бастакылар хамсааһыннарын” федеральнай түһүмэҕэр өрүү ситиһиилээхтик кытталлар, миэстэлэһэллэр. Бу – Москваҕа тэриллибит бастакы көмөнү оҥоруу чөмпүйэнээтэ, Тулаҕа, Благовещенскайга буолбут университеттар симиэнэлэрэ, Хабаровскайга ыытыллыбыт “Амур” пуорум, ВДНХҕа “Арассыыйа” норуоттар икки ардыларынааҕы быыстапка-пуорум аһыллыытыгар Бастакылар хордара о.д.а.

Саха сирин бырайыактарын биһирээн дойду таһымыгар ыыталлар. Холобур, “Юные якутяне” уопсастыбаннай хамсааһын 2020 сыллаахха көҕүлээбит “Көр, бу Арассыыйа!” күрэс Арассыыйа бары оҕолорун түмэр кыахтанна. Аны 1996 сыллаахха саҕаламмыт оҕо успуорка оонньуулара билигин “Азия оҕолоро” аатынан аан дойдуга тиийэ биллэр.

Ити курдук, Саха сирин үөрэнээччилэрэ улахан дьонтон хаалсыбакка киэҥ далааһыннаах бырайыактары толкуйдууллар, олоххо киллэрэллэр.