Бүгүн  «Ежегодник Саха театра. Театральные сезоны 2017-2024» саҥа таһаарыыны билиһиннэриэхтэрэ

Кулун тутар 27 күнүгэр, Тыйаатыр норуоттар икки ардыларынааҕы күнүгэр, киэһэ 18.00 чаастан  Былатыан Ойуунускай аатынан Саха академическай тыйаатырыгар М.С.Щепкин аатынан Тыйаатыр үрдүкү училищетын бүтэрбит саха үһүс устуудьуйатын 50 сылларыгар аналлаах таһаарыыны сүрэхтиэхтэрэ.

“Саха тыйаатырын ежегоднига” төрдүс таһаарыыга ураты болҕомто М.Щепкин аатынан училищены бүтэрбиттэрэ 50 сылын 2024 сыллаахха бэлиэтээбит  үһүс устуудьуйа айар үлэтигэр ууруллубут.

Ону тэҥэ Олоҥхо тыйаатырын төрүттэниитигэр улахан оруоллаах уһулҥуччулаах дьон кылааттара, ону таһынан тыйаатыр 2017-2024 сылларга айар үлэтэ сырдатыллыбыт.

Ааптардар бэлиэтииллэринэн, бу улахан таһаарыы саха тыйаатырын ускуустубатын устуоруйатын уонна аныгы кэмин кэрэхсиир дьоҥҥэ элбэх иһитиннэриини биэриэҕэ.

Бугүн көрөөччүлэргэ көлүөнэлэр алтыһыыларын, маастартан үөрэнээччигэ билии уонна уопут хайдах бэриллэрин туһунан “Учуутал уонна үөрэнээччилэр” диэн  тыйаатыр туруоруутун бэлэхтиэхтэрэ.

Санатан эттэххэ,  2010 сыллаахха  “Саха тыйаатырын антологията” үс кинигэ тахсыбытын кэнниттэн “Саха тыйаатырын ежегоднига” бастакы кинигэ 2012 сылаахха күн сирин көрбүтэ. Бырайыак ааптара уонна салайааччыта – СӨ Судаарыстыбаннай Мунньаҕын (Ил Түмэн)  бэрэссэдээтэлин бастакы солбуйааччы  Александр Жирков.