Бүгүн — Физкультурник күнэ

Арассыыйаҕа бүгүн Физкультурник күнэ. Бэлиэ күнүнэн РФ успуорка миниистирэ Михаил Дегтярев спортсменнары, бу эйгэ исписэлиистэрин, физкултуураны сөбүлүүр дьону барыларын эҕэрдэлээтэ.

Кини успуорт уонна физкултуура судаарыстыба социальнай-экэнэмиичэскэй сайдыытын биир сүрүн тирэҕинэн буоларын бэлиэтээтэ. Успуорт уонна физкултуура салаатыгар 430 000-тан тахса киһи үлэлиир. Тириэньэр уонна инструктор идэлэрэ ирдэбиллээхтэр уонна кэскиллээхтэр.

—РФ Бэрэсидьиэнэ В.Путин: «Маассабай успуорка ураты болҕомтону ууруохпут. Биһиги сыалбыт-сорукпут — 2030  сылга диэри сааһыттан тутулуга суох успуордунан тиһиктээхтик дьарыктанааччылары 70% диэри тиэрдии. Арассыыйаҕа физическэй култуура уонна успуорт сайдыытын стратегиятын олоххо киллэрии чэрчитинэн, бу көрдөрүүлэри ордук оҕолор уонна ыччаттар ортолоругар ситистибит, — диэн бэлиэтиир РФ успуордун министрэ Михаил Дегтярев.

Саха сиригэр бүгүн, атырдьах ыйын 10  күнүгэр, Физкультурник күнүнэн тэрээһиннэр саҕаланнылар. Ол иһигэр «Успуорт — олох нуормата» бырайыагынан. Быйыл бырааһынньык РФ Дьиэ кэргэн, Саха сиригэр Оҕо саас сылыгар ананна.

Ил Дархан Айсен Николаев «Успуорт — олох нуормата» федеральнай бырайыагынан өрөспүүбүлүкэҕэ физкултууранан уонна успуордунан утумнаахтык дьарыктанар дьон ахсаана элбээбитин бэлиэтээбитэ. Чэбдик, чэгиэн олоҕу, маассабай успуорду киэҥник тарҕатар сыаллаах-соруктаах үлэнэн, спортивнай инфраструктура тутуллуутунан успуордунан тиһиктээхтик дьарыктанааччылар ахсааннара өрөспүүбүлүкэҕэ кэнники биэс сылга 1, 7  төгүл улааппыт.

Физкультурник күнүнэн өрөспүүбүлүкэҕэ доруобуйаны чэбдигирдэр сэрээккэлэр, спортивнай бэстибээллэр, спортивнай комплекстарга абонеменнары оонньотуулар ыытыллаллар. Күн устатыгар өрөспүүбүлүкэ үрдүнэн успуорт былаһааккаларыгар араас күрэхтэһиилэр болҕомтону тардыахтара, тэрээһиннэргэ биллэр-көстөр спортсменнар уонна тириэньэрдэр кыттыыны ылаллар.

Дьокуускайга бэлиэ күн тэрээһинэ Н.Н.Тарскай аатынан «Туймаада» стадиоҥҥа ыытыллар.

Киин куорат успуорка аренатыгар быыстапкаларгы сылдьыҥ. Манна Саха сирин успуорка ситиһиилэрин туһунан билиэххит-көрүөххүт, ону таһынан, саҥа үөрэх дьылын көрсө оҕолоргутун спортивнай сиэксийэлэргэ сурутуоххут. Доруобуйаны чөлүгэр түһэрии уонна успуорт мэдиссиинэтин киинэ тэрээһин кыттыылаахтарыгар сүбэ-ама биэрэр, доруобуйаҕытын көрөр.

Өрөспүүбүлүкэҕэ успуорт 109  көрүҥэ сайдар, 69 спортивнай федерация баар.

2024 сылга успуорт уон эбийиэгэ тутуллар. Быйыл Дьокуускайга элбэх хайысхалаах успуорт саалата, Чурапчыга А.Софронов аатынан култуура-успуорт комплекса, Хатаска успуорт комплекса үлэҕэ киирбиттэрэ.

Саха сиригэр кэнники биэс сылга араас бырагыраамаларынан, ол иһигэр «Демография» национальнай бырайыагы киллэрэн туран, успуорт 36  бөдөҥ эбийиэгэ аһыллыбыта. Ону сэргэ, 37 дьоҕус былаһаакка тэриллибитэ, успуорт оскуолаларын саҥа тэрилинэн, малынан-салынан хааччыйыы ыытыллар.

Быйыл сайын Саха сиригэр VIII «Азия оҕолоро» Норуоттар икки ардыларынааҕы спортивнай оонньуулар үрдүк таһымнаахтык ыытылыннылар. Далааһыннаах күрэхтэһии түһүлгэтигэр Азия 24 дойдутуттан, Москваттан, Саха сириттэн хамаандалар кыттыыны ыллылар.

СӨ Ил Дарханын уонна Бырабыыталыстыбатын пресс-сулууспата