Бүгүн Гавриил Чиряев 100 сылыгар аналлаах документальнай киинэ премьерата буолуоҕа

Биллэр-көстөр судаарыстыбаннай уонна бэлитиичэскэй диэйэтэл 100 сылыгар аналлаах “Путь Гавриила Чиряева” документальнай киинэни “Саха” НКИХ көрдөрүөҕэ. Премьера бүгүн, муус устар 4 күнүгэр, Гавриил Чиряев төрөөбүт күнүгэр “Саха” НКИХ ханаалыгар уонна “Якутия 24” киэһэ 21:00 чааска буолуоҕа.

Киинэни оҥорууга документалист Дарья Ермолаева, режиссердар Лариса Амбросьева, Дмитрий Андерсон уонна оператор Андрей Лазарев үлэлэстилэр.

Киинэ уһуна 60 мүн. Бу архыып докумуоннарыгар, киинэ хроникатыгар, Гавриил Чиряев сэдэх хаартыскаларыгар уонна автобиографическай суруктарыгар олоҕуран оҥоһулунна.

“Киинэҕэ Чиряев киһи быһыытынан таһымын уонна Хотугу эрэгийиэн сайдыытыгар кини киллэрбит кылаатын өйдүүргэ историческай кэм, кэм уонна көлүөнэ тыына көстөр, кини үөлээннээхтэрин ахтыылара, устуоруктар этиилэрэ уонна архыып сэдэх матырыйааллара түмүлүннүлэр” – диэн бырайыак ааптардара бэлиэтииллэр.

Санатан эттэххэ, быйыл Саха сирэ Гавриил Чиряев 100 сылын бэлиэтиир. Өрөспүүбүлүкэтээҕи тэрийэр кэмитиэт үлэлиир. Бу туһунан Ил Дархан уонна Бырабыыталыстыба пресс-сулууспата суруйар.