Бүгүн Гавриил Чиряев төрөөбүтэ 100  сыла бэлиэтэнэр

Бүгүн, муус устар 4 күнүгэр, биллиилээх судаарыстыбаннай, бэлитиичэскэй диэйэтэл, ССКП КК чилиэнэ, ССРС, САССР Үрдүкү Сэбиэттэрин дьокутаата, ССКП Саха сиринээҕи обкомун бастакы сэкирэтээрэ, өрөспүүбүлүкэни 1965-1982  сс. салайбыт, Саха сирин бүттүүнэ киэн туттар биир чулуу киһитэ Гавриил Иосифович Чиряев төрөөбүтэ 100  сыла.

Олоҕун олуктара

1925 сыл муус устар 4 күнүгэр Бүлүү оройуонун Чочу нэһилиэгэр Кыадаҥдаҕа төрөөбүтэ.

1942-1943 сс. — Бүлүү куорат орто оскуолатын учуутала. Бүлүү орто оскуолатын бүтэрээт, 17 саастааҕар, биир сыл 10—11 кылаастарга учууталлаабыт, физиканы уонна байыаннай дьыаланы үөрэппит.

— 1943-1950 сс. — Забайкалье байыаннай уокурукка сулууспалаабыта. 18 сааһын туолаат, Кыһыл Аармыйаҕа ыҥырыллан, Монголия сиригэр сулууспатын барбыта, квантунскай аармыйаны утары сэриилэспитэ. 1950 сыллаахха сулууспата бүтэригэр, политуправление начальнига Кулагин Гавриил Чиряев инникитин өтө көрөрдүү «Вы будете министром в своей республике» диэн эппит эбит.

— 1944 сылтан ВКП(б) чилиэнэ.

— 1949 сыллаахха Забайкалье военнай уокурук политуправлениетын иһинээҕи марксизм-ленинизм киэһээҥҥи университетын бүтэрбит. Маны ааҕыҥ “Кистэлэҥ эрэллээх көрсөбүт…”

— 1951-1953 сс. — Саха АССР Үөрэҕириитин министиэристибэтин каадрга управлениетын начальнига. Бу үлэлээбит сылларын туһунан Евдокия Иннокентьевна Коркина, хойукку кэмҥэ саха биир бөдөҥ учуонайа, ахтыытыттан: «Үөрэҕириитин министиэристибэтин кадрдарга салалтатын эдэр, соторутааҕы Кыһыл аармыйаттан босхоломмут быһыылааҕа, Г.И.Чиряев баһылыыра. Аҕыйах тыллаах, холку майгылаах, дьоһун эдэр киһи этэ. Партийнай уонна да атын мунньахтарга тыл этиитэ ураты боччумнаах, дуоспуруннаах буолаллара. Ол да буоллар, бырааһынньыктарга, эдэр киһи быһыытынан көхтөөх буолара, бэркэ ыллыыра уонна үҥкүүлүүрэ».[1]

— 1953 сыллаахха Дьокуускай куоракка Саха педагогическай институтун история факультетын бүтэрбитэ.

— 1953-1955 сс. — ССКП Саха обкомун оскуолалар отделларын инструктора.

— 1955-1958 сс. — Үөһээ Бүлүү райкомун иккис сэкирэтээрэ.

— 1958-1959 сс. — ССКП Саха обкомун пропаганда уонна агитация отделын сэбиэдиссэйин солбуйааччы.

— 1959-1961 сс. — ССКП Саха обкомун наука уонна оскуолалар отделын сэбиэдиссэйэ.

— 1961-1963 сс. — ССКП Саха обкомун сэкирэтээрэ.

— 1963-1965 сс. — ССКП Саха обкомун идеологияҕа салаатын сэбиэдиссэйэ.

— 1965 сыл алтынньы —1982 сыл ыам ыйа — ССКП Саха обкомун бастакы сэкирэтээрэ.

— 1972 с. — экэнэмиичэскэй билим кандидаттарыгар диссертациятын ситиһиилээхтик көмүскээбитэ.

— 1982 сыл ыам ыйын 9 күнүгэр олохтон туораабыта.

Сахалыы бикипиэдьийэттэн