Бүгүн – Хомус күнэ

Бүгүн, сэтинньи 30 күнэ — Хомус күнэ. Бу күн  Егор Борисов Ил Дарханынан олорон 2011 сыллаахха таһаарбыт ыйааҕынан бэлиэтэнэр. Саха сиригэр биллэриллибит Хомус күнүн бүтүн аан дойдуга бэлиэтииллэр.

Бу күн Туймаада туонатыгар, өрөспүүбүлүкэ бары муннугар араас тэрээһиннэр ыытыллаллар. Ол курдук, бүгүн, сэтинньи 30 күнүгэр, 16:00 чаастан, Д.К.Сивцев-Суорун Омоллоон аатынан Опера уонна балет судаарыстыбаннай тыйаатырыгар “Алгыс” ансаамбыл “Алгыстаах аартыгынан” быыстапката туруоҕа.

Салгыы 16:30 чаастан эдэр хомусчуттар кэнсиэртэрэ тэриллэр. Бырааһынньыктааҕы кэнсиэргэ Георгий Слепцов-Чаҕылхан устуудьуйатын хомуска үөрэнээччилэрэ, “Арыллыы”, “Арчы” ансаамбыллар, аан дойду виртуоз-хомусчута Варвара Степанова-Арчыына, импровизатор-хомусчуттар Артур Семенов, Надежда Варламова, Татьяна Куприянова, Алена Слепцова-Күн Чөмчүүнэ кыттыахтара.

Киэһэ 18:00 чаастан Саха АССР тэриллибитэ 100 сылыгар, “Алгыс” ансаамбыл төрүттэмитэ 60 сылыгар аналлаах Хомус күнүн бэлиэтиир “Алгыстаах аартыгынан” үөрүүлээх тэрээһиҥҥэ ыҥыраллар. Кэнсиэргэ “Алгыс” ансаамбыл солистара, кинилэр үөрэнээччилэрэ, аан дойду виртуоз-хомусчуттара кыттыахтара.

Тэрээһин Д.К.Сивцев-Суорун Омоллоон аатынан Опера уонна балет судаарыстыбаннай тыйаатырыгар буолар. Киириитэ босхо. Хомускутун уктан кэлэргитин умнумаҥ, сылга биирдэ ыытыллар тэрээһини куоттарымаҥ.