Бүгүн — Хотугу аҕыйах ахсааннаах төрүт норуоттар Ассоциацияларын күнэ

Ахсынньы 12 күнүгэр Саха сиригэр Хотугу аҕыйах ахсааннаах төрүт норуоттарын Ассоциациятын күнэ бэлиэтэнэр. Бүгүн бырааһынньыктааҕы тэрээһиннэр Дьокуускайга А. Е. Кулаковскай аатынан Норуоттар доҕордоһууларын дьиэтин гостинайыгар ыытыллыахтара.

Бу күн Хотугу төрүт норуоттарга суолталаах боппуруостары дьүүллэһэр төгүрүк остуол ыытыллыаҕа. Ону тэҥэ, этническэй түмсүүлэр икки ардыларыгар строганина күрэҕэ буолуоҕа уонна «Дуннэдув» IV маастардар быыстапкаларын кыайыылаахтарын наҕараадалыахтара.

Бырааһынньыгы үөрүүлээх мунньах түмүктүө. Онно дьиэ кэргэн династияларын күрэҕин кыайыылаахтарын биллэриэхтэрэ уонна тэрилтэ активистарын – үбүлүөйдээхтэри чиэстиэхтэрэ.

Саха сирин Хотугу аҕыйах ахсааннаах төрүт норуоттар Ассоциациялара 1989 сыл ахсынньы 12 күнүгэр тэриллибитэ. Кини эбээннэри, эбэҥкилэри, долгааннары, чукчалары, дьүкээгирдэри уонна Арктика нуучча былыргы олохтоохторун түмэр.

Саха сиригэр төрүт норуоттар интэриэстэрин көмүскээһиҥҥэ баай уопут мунньулунна. 1990-с сыллартан аҕа уустарын общиналарын өйүүргэ анаан 20-тэн тахса сокуон ылыллыбыта. 2010 сыллааҕы этнологическэй эспэртииһэ  туһунан сокуон күүһүнэн, төрүт норуоттар түмсүүлэрэ 400 мөлүйүөн солкуобайтан тахса суумалаах төлөбүрү ылбыттара.