Бүгүн киэһэ Дьокуускай куоракка тахсыбыт суол саахалыгар биир киһи олоҕо быһынна

Бүгүн киэһэ, быһа холуйан 19 ч. 15 мүн. Дьокуускай куоракка Михаил Николаев проспегар суол быһылаана таҕыста. “Барыллаан быһаарыынан, Тойота Марк-II  массыынаны ыытан испит 2005 с. т. кыыс суолга утары тахсан биэрэн, оптуобуһу кытта харсыста”, – диэн ИДьМ Госавтоиниспиэксийэтин анал батальонун хамандыыра, полиция подполковнига Алексей Кривошеев иһитиннэрэр.  

Ол түмүгэр, оптуобус суоппара уонна оптуобуска олорсон испит дьон эмсэҕэлээтилэр. Хомойуох иһин, массыына ыытан испит эдэр кыыс “суһал көмө” массыынатыгар тыына быһынна.

СӨ Доруобуйа харыстабылын министиэристибэтэ иһитиннэрбитинэн, суол быһылааныгар суһал массыына көмөтүн 6 биригээдэтэ тиийбит. Эмсэҕэлээбит 7 киһини өрөспүүбүлүкэтээҕи балыыһаҕа, икки киһини травмпууҥҥа илдьибиттэр. Эмсэҕэлээбит дьоҥҥо мэдииссинэ үлэһиттэрэ бары ирдэниллэр көмөнү оҥороллор.