Бүгүн сорох улуустарга күнүс -10…-15°С кыраадыс буолуо

Саха сирин синоптиктара тохсунньу 22 күнүгэр Саха сирин үгүс оройуоннарынан  күнүс -10…-15°С кыраадыс тымныы буоларын билгэлииллэр.

Өрөспүүбүлүкэ арҕаа өттүгэр, киин улуустарынан хаар түһэр, түүн Кэбээйи, күнүс Мииринэй, Томпо улуустарынан кыралаан хаардыыр, кыра тыаллаах, арҕаа, Өлүөнэ өрүс алын тардыытынан тибиилээх.

Арктика улуустарынан хаар түһэр, сорох улуустарынан тибиилээх, сөкүүндэҕэ 9-14 м. түргэннээх тыаллаах, Булуҥ улууһугар сорох сиринэн буурҕа, сөкүүндэҕэ 15-20 м. диэри күүстээх тыал түһэр.

Салгын температурата арҕаа, хотугулуу илин түүн уонна күнүс  -40-45°С, сорох сиринэн -46-51°С кыраадыс тымныы. Арҕаа түүн -15-20°С, күнүс -10-15°С, соҕуруулуу-илин түүн сорох улуустарынан -8-13°С, күнүс -3-8°С кыраадыс тымныы. Атын улуустарынан түүн -20-25°С, былыта суох буоллаҕына -25-30°С, күнүс -15-20°С, сорох сиринэн -23-28°С кыраадыс тымныы.