Бүгүн күүстээх магнитнай буурҕа түһэр

Бүгүн, ыам ыйын 12 күнүгэр, Күҥҥэ улахан эстиилэр буолуохтара. Ол эбэтэр, бу күн күүстээх магнитнай буурҕа түһэ турарын астрономия лабораториялара бэлиэтииллэр диэн СИА суруйар.

Магнитнай буурҕа күүһэ 4-5 баалга тэҥнэһиэҕэ. Саамай күүстээх кэмэ Саха сиригэр күнүс 12 чаастан 3 чааска диэри түбэһэр. Бу кэнниттэн Сир геомагнитнай хонуута чөлүгэр түһүөҕэ уонна ый бүтүөр диэри кэминэн туруоҕа.

Маннык кэмҥэ күн-дьыл туругуттан тутулуктаах дьон доруобуйалара мөлтүөн, ыарыылара бэргиэн, сэниэлэрэ эстиэн, хааннарын баттааһына үрдээн, төбөлөрө ыалдьыан, настарыанньалара түһүөн-тахсыан сөп. Онон магнитнай буурҕа кэмигэр бэйэни харыстанан, күүскэ үлэлээбэккэ, ноҕуруускаламмакка, таһырдьа сибиэһэй салгыны сайа тыынан, элбэх ууну иһэн, холку соҕустук сылдьыбыт ордук диэн быраастар сүбэлииллэр.