Бүгүн күүстээх магнитнай буурҕа түһэр

От ыйын 14-16 күннэригэр Сиргэ күүстээх магнитнай буурҕа түспүтэ бэлиэтэнэр.  Ол курдук, от ыйын 14 күнүгэр Күҥҥэ 5 улахан эстиилэр буолбуттара, ол иһигэр биирэ үрдүкү X кылаастаах диэн Прикладной геофизика институтугар иһитиннэрдилэр.

Бу кэнниттэн Сир геомагнитнай хонуута чөлүгэр түһүөҕэ уонна ый бүтүөр диэри кэминэн туруоҕа.

Бэлиэтээн эттэххэ,  күҥҥэ магнитнай эстиилэри рентген сардаҥаларын күүһүттэн кыамтатыттан көрөн, биэс кылаастарга араараллар: А, Б, С, М уонна Х. Күҥҥэ эстиилэр кылаастарынан 10 төгүл улаатан иһэллэр. Бу дьайыылар ийэ сиргэ магнитнай буурҕалары үөскэтэллэр.

Күүстээх магнитнай буурҕа кэмигэр сүрэх-тымыр ыарыылаах дьон дабылыанньалара түһүөн-тахсыан, доруобуйалара мөлтүүр. Онон бу күннэргэ бэйэни кэтэнэн көрөн, ноҕуруускаламмакка сылдьыахха наада. Маны тэҥэ, араадьыйа, сибээс, Сир аргыстарын үлэлэригэр харгыстар тахсыахтарын сөп.