Бүгүн магнитнай буурҕа күүһүрэр

 Халлаан туруга уларыйыытыттан тутулуктанар дьоҥҥо сэтинньи бүтэһик күннэрэ уоскулаҥы биэрбэтэ. Ол курдук, кэнники күннэргэ исписэлиистэр дьон туругар уонна тиэхиньикэ үлэтигэр дьайар хас да кэккэ магнитнай буурҕалары бэлиэтииллэр.

Бүгүн, сэтинньи 27 күнүгэр, учуонайдар магнитнай буурҕа үрдүк таһымнаах буолуоҕун сэрэтэллэр. Күн астрономиятын лабораториятын дааннайдарынан, сэтинньи 27 күнүгэр магнитосфера 4 бааллаах күүһүгэр сөп түбэһэр. Маннык көрдөрүү сэтинньи 28 күнүгэр эмиэ оннунан хаалыаҕа, онно эмиэ 4 баал — үрдүк  таһымнаах буолара сабаҕаланар.

Салгыы сэтинньи 29 уонна 30 күннэригэр геомагнитнай хамсааһын уоскуйуоҕа — күүһэ 2 баалга диэри намтыаҕа (от күөх таһым). Ол аата буурҕа күүтүллүбэт, оттон магнитнай хамсааһыннар нуормаҕа чугаһыыллар.

Санатар буоллахха, мөлтөх да, орто да магнитнай күүрүүлэр дьон туругар дьайыахтарын сөп: төбө ыарыыта, хаан баттааһынын хамсааһына, кыыһырымтаҕай буолуу, болҕомто мөлтөөһүнэ уонна үлэлиир кыах намтааһына баар буолуон сөп. Ордук кэбирэх буолаллар халлаан туругуттан тутулуктаах, аҕам саастаах уонна сүрэх-тымыр, неврологическай, дьарҕа ыарыылаах дьон. Ноҕуруускаттан туттунуохтарын, сынньаныахтарын, уу иһиэхтэрин наада.