Бүгүн магнитнай буурҕа таһыма күүһүрэр

Сэтинньи 17 күнүгэр, бэнидиэнньиккэ, магнитнай буурҕа таһыма күүһүрэр. Геомагнитнай индексэ биллэ үрдүүр.

Эспиэрдэр халлаан туругуттан тутулуктанар дьоҥҥо хайдах бэлэмнэниэххэ сөбүн туһунан сүбэлээтилэр. Ол курдук, учуонайдар сабаҕалааһыннарынан геомагнитнай Кр индекса биэскэ тиийэ үрдүөҕэ. Маннык көрдөрүү G1 кылаастаах магнитнай буурҕаҕа тэҥнэһэр. Бүгүн күнтэн кэлэр тыал сөкүүндэҕэ 650 килэмиэтир түргэннээх буолуоҕа. Бу көрдөрүү «кыһыл» бэлиэни  куоһарар.

Магнитнай буурҕа кэмигэр утуйар уу эрэсиимин бэрээдэктиир наада. Быраастар киэһэтин эрдэ утуйарга, сарсыарда эрдэ уһуктарга, хас күн аайы биир кэмҥэ аҕыс чаас устата утуйарга сүбэлииллэр. Ону таһынан, утуйар иннинэ биир чаас инниттэн араас гаджеттары (төлөпүөнү, планшеты, көмпүүтэри) туһаныыны тохтоторго сүбэлииллэр. Бу нервнэй системаҕа ноҕуруусканы аҕыйатыаҕа. Ону кытта элбэх уу иһиллиэхтээҕин умнумаҥ. Күн аайы икки лиитирэ кэриҥэ  ыраас ууну иһии, төбө ыарыытын тохтотор.