Бүгүн — Марха өрүс күнэ бэлиэтэнэр

Бүгүн, балаҕан ыйын 9 күнүгэр, Ньурба оройуонугар Марха өрүс күнүн бэлиэтииллэр.

Ньурба улууһун Мунньаҕын дьокутааттарын быһаарыытынан быйыл аан бастакытын Марха өрүс күнэ бэлиэтэнэр. Санаттахха, маннык этиини улуус Мунньаҕар «Марха өрүс көмүскээччилэрэ» түмсүү бэрэссэдээтэлэ Любомир Михайлов көтөхпүтэ. Бу быһаарыы Марха өрүс ураты историческай суолталаах территорияларын харыстыырга, экологическай үөрэҕи үрдэтиигэ, өрүскэ харыстабыллаах сыһыаны күүһүрдэргэ ылыныллыбыта.

Ол курдук, сыл ахсын Марха өрүс күнэ балаҕан ыйын 9 күнүгэр бэлиэтэнэр. Марха өрүс — Бүлүү өрүс хаҥас салаата, уһуна 1181 км.

Бу үөрүүлээх күнү көрсө Ньурба улууһун Мунньаҕын дьокутааттара Чукаартан Маргарита Егорова хоһооннорун ааҕан, видеоҕа уһулан социальнай ситимнэринэн тарҕатан бэлэх ууннулар. Бу туһунан улуус Мунньаҕын ТГ-ханаала суруйар.