Бүгүн Олимпиада көбүөрүгэр Айаал Лазарев уонна Виктор Рассадин тахсыахтара

Бүгүн, атырдьах ыйын 9 күнүгэр,  Париж куоракка ыыттылар Олимпиадаҕа  74 уонна 125 киилэҕэ диэри ыйааһыннаахтарга көҥүл тустууга Виктор Рассадин уонна Айаал Лазарев утарсааччыларын кытта күөн көрсүөхтэрэ.

Саха спортсмена Виктор Рассадин 74 киилэ диэри ыйааһыҥҥа утарсааччыта Европа 2022 сыллааҕы чөмпүйүөнэ Грецияттан Георгеос Кугумцидис буолуоҕа. Салгыы бу киирсиигэ Виктор Рассадин кыайыылаах таҕыстаҕына, аныгыс утарсааччыларынан көбүөргэ Африка чөмпүйүөнэ  Египеттэн Амр Реда Хуссен уонна Кытайтан Лу Фэн тахсыахтара.

Оттон Айаал Лазарев 125 киилэҕэ диэри ыйааһыҥҥа аан дойду икки төгүллээх чөмпүйүөнэ, Олимпийскай оонньуулар боруонса призера Ирантан Амир Хоссей Заре утары тахсыаҕа. Салгыы кыайыылаах бөҕөһү кытта Панамерика чөмпүйүөнэ Амар Дхеси, эбэтэр аан дойду вице-чөмпүйүөнэ Дэн Чживэй киирсэллэрэ күүтэллэр.

Бу ыйааһыҥҥа тустуулар Саха сирин бириэмэтинэн киэһэ 18:00 чаастан  саҕаланыаҕа.

Санаттахха, Саха сиригэр көҥүл тустууну сэҥээрээччилэр көҕүлээһиннэринэн атырдьах ыйын 9-11 күннэригэр Дьокуускай куоракка төрүт успуорт көрүҥнэрин сайыннарар «Модун» успуорт комплексыгар Олимпийскай оонньуулартан быһа холбонуулары көрдөрөллөр. Киириитэ босхо.

Ону кытта куйаар ситимигэр бу сигэнэн киирэн быһа эпиири көрүөххэ сөп:

1) Олимпиада официальный саайта (манна аккаунт арыныахха наада): https://olympics.com/ru/paris-2024/videos/live/wrestling

2)ВКонтакте саайтка «Спорт без границ» бөлөххө (нууччалыы комментарийдаах буолуоҕа): https://vk.com/sportwithoutborders

3) IRON телеграм-ханаалга (сахалыы комментарийдаах буолуоҕа): https://t.me/+uAWf6_exOmIzZDky