Бүгүн — орто анал үөрэх күнэ

«Н.Е. Мординов-Амма Аччыгыйын аатынан үөрэхтээһин холбоһуга»  тэрилтэ 2018 сыллаахха Харбалаахтааҕы профессиональнай лиссиэй уонна орто оскуола холбононнор тэриллибитэ. Бу —  Саха сиригэр орто анал идэни биэрэр уонна уопсай үөрэхтээһин биир кэлимсэ буолан үлэлээһиннэрин бастакы хараҥаччыта.

2019 сыллаахха оччотооҕу Үөрэх уонна наука министиэристибэтин орто анал үөрэхтээһинигэр миниистири солбуйааччы Нюргуна Афанасьевна Соколова салалталаах үлэлиир бөлөх кэлэн, кэлэктииби кытта улахан сүбэ мунньаҕы  тэрийбитэ. Холбоһук хайдах үлэлиэн сөбүгэр сүбэ-соргу  биэрбиттэрэ. Үс хайысханан арахсан, сайдыы хайдах барыан сөбүн анаарар бырайыактары толкуйдаан оҥорон, көмүскээһин тэриллибитэ.

Ити үлэлэринэн сирдэтэн холбоһук үлэтин сүрүнэ торумнаммыта. Онтон номнуо   5 сыл ааһа оҕуста. Холбоһук лиссиэй өттүнээҕи салаатыгар баһаарынньык, электромонтер, хайаны байытар үлэ машиниһа, тыа хаһаайыстыбатын маастара,тимиртэн уһанар уус идэлэригэр үөрэтэр. Баһаарынньык уонна хайаны байытар үлэ машиниһа идэлэргэ 9 кылаас кэнниттэн үөрэнэллэр.Манна киэҥ Сахабыт сирин араас улуустарыттан сыллата элбэх оҕо кэлэн үөрэнэн, идэ ылар.

Холбоһук дириэктэринэн былырыыҥҥыттан  СӨ үөрэҕириитин туйгуна Анна Васильевна Мосоркина үлэлиир. Кини кэскили көрөн, дириҥник ылсан үлэлээн эрэрэ барыбытын үөрдэр. Быйыл икки саҥа мастарыскыайы туруорсан ылла, ону таһынан, үөрэнэр куорпуска, остолобуойга улахан өрөмүөнү ыыттарда. Киниэхэ күүс-көмө, өйөбүл буолаллар:  үөрэх-производство өттүгэр солбуйааччыта  Ульяна Васильевна Егорова, иитэр үлэни сүрүннээччи Надежда Еримеевна Большакова.

Былырыыҥҥы үөрэх дьылыгар улахан ситиһиилэртэн быһа тардан билиһиннэрдэххэ: 2-с  куурус устудьуона Оконешников Александр Бүтүн Арассыыйатааҕы «Путь к успеху» НПК-ҕа кыттан,  1 миэстэни ылбыта, салайааччылара РФ  үөрэҕириитин бочуоттаах үлэһитэ, РФ  үөрэхтээһинин бочуоттаах бэтэрээнэ Галина Григорьевна Сорова, маастар Алексей Александрович Ксенофонтов. Өрөспүүбүлүкэтээҕи «Идэ маастарыстыбатын» күрэҕэр холбоһук хамаандата «Быыһыыр үлэлэр» күрэххэ 3 миэстэни ылан, кыайыы өрөгөйүн билбиттэрэ. Салайааччылара — маастардар Тарасов Геннадий Михайлович, Васильев Игорь Аркадьевич. 9  кылаас үөрэнээччитэ Сердцев Женя иккис сылын субуруччу өрөспүүбүлүкэтээҕи «Эдэр профессионаллар» күрэххэ иккис, маҥнайгы миэстэлэри ылбыта. Бу олус туһалаах массыына өрөмүөнүн күрэҕэр Женяны маастар Сергей Васильевич Петров бэлэмнээн кытынннарар. Устудьуоннар  араас күрэхтэргэ, ырыа, үҥкүү бэстибээллэригэр куруук көхтөөхтүк, ситиһиилээхтик кытталлар.

Оскуола үөрэнээччилэрэ 9 кылаас кэнниттэн салгыы лиссиэй бөлөхтөрүгэр көһөн үөрэнэн, аттестаты сэргэ идэ ылан бүтэрэр буоллулар.

Иитэр үлэ оскуоланы кытта сэргэ, тэҥҥэ барар. Оскуолабыт үөрэнээччилэрэ лиссиэй өттүгэр куруһуоктарга дьарыктанан, идэҕэ хайысха ылаллар.Устудьуоннар Харбалаахха баар таас чоҕу хостуур «Төлөн» ААО-ҕа быраактыкаларын бараллар, сорохтор үөрэхтэрин бүтэрдэхтэринэ, үлэлии киирэллэр. РФ профессиональнай үөрэҕин туйгуннара, настаабынньыктар Сорова Галина Григорьевна, Попова Антонина Егоровна, Григорьева Виктория Валериановна, Протопопов Виктор Васильевич эдэрдэргэ көмөлөрө, өйөбүллэрэ тугунан да кэмнэммэт Профессиональнай Харбалаахтааҕы  үөрэхтээһин холбоһуга нэһилиэк олоҕор куруук көхтөөхтүк кыттан, сүрүн хамсатар күүс буолар.

Бүгүн «Орто анал үөрэх» күнүнэн устудьуоннары, үлэһиттэри, учууталлары эҕэрдэлиибин! Сайдыыга олук уурар орто анал идэни биэрэр олус наадалаах үлэҕит кэскилэ кэҥээтин, үүнэн-сайдан истин!

Валентина КРИВОШАПКИНА,  СӨ үтүөлээх учуутала, Таатта, Харбалаах