Бүгүн — Саха Өрөспүүбүлүкэтигэр Табаһыт күнэ

Бүгүн, кулун тутар 1 күнүгэр, Саха сиригэр Табаһыт күнэ. Ил Дархан Айсен Николаев 2020 сыл атырдьах ыйын 9 күнүгэр төрүт олохтоох, аҕыйах ахсааннаах хотугу омуктар үгэстэрин, төрүт дьарыктарын харыстааһыҥҥа, сайыннарыыга табаһыт оруолун, табаны иитии өрөспүүбүлүкэ экэниэмикэтигэр биир улахан суолталаах салаа буоларын бэлиэтээн, кулун тутар бастакы субуотатыгар Табаһыт күнүн бэлиэтиир туһунан уурааҕы таһаарбыта.

Табаһыттар — айылҕа ураты экстремальнай усулуобуйатыгар көһө сылдьан, үлэлиир-хамсыыр дьоннор. Дойду уопсастыбаннай пограничниктара, уопсастыбаннай экологтар, ирбэт тоҥу араҥаччылаачылар.

Саха Өрөспүүбүлүкэтэ табаны иитиигэ Арассыыйаҕа үһүс миэстэҕэ сылдьар. Саха сиригэр таба иитиитин сайыннарыыга сыл ахсын 1 миллиард солкуобайтан тахса үп-харчы көрүллэр. Бүгүҥҥү туругунан 114 хаһаайыстыбаҕа 1245 киһи үлэлиир, ол иһигэр 1010 бостуук уонна 235 чуум үлэһитэ.

Сахастат дааннайынан, Саха сиригэр таба ахсаана 2024 сыл бүтүүтэ бары хаһаайыстыбаларынан 162 599 буолбут. Саамай элбэх сүөһү ахсаана Усуйаана оройуонугар бэлиэтэммит — 33 557, салгыы Анаабырга — 21 306 уонна Булуҥҥа — 16 660.